OQO: Týystary balasyn ólimshi etip sabaǵan kelinshek týraly jantúrshigerlik jaıttardy aıtyp berdi

Týystary Ordabasy aýdany Bógen aýylynda turatyn áıeldiń esimi Aqmonshaq Battalǵazıeva, al jasy 26-da  ekenin aıtty. Aqmonshaqtyń tuńǵysh uly Asyl 7 jasta bolsa, odan keıingi balasy 4-te, kishi qyzy áli aıaǵyn baspaǵan. Naǵashy jaǵynan jeńgesi Sandýǵash Joldasbekovanyń sózinshe, qaıynsińlisi eshkimniń aqylyna qulaq aspaı, qalaı bolsa solaı ómir súredi. Onyń aıtýynsha Aqmonshaq oqyp júrgende Asylǵa júkti bolyp qalypty. Ony úıindegilerge bildirtpeımin dep ishin baılap, dári iship júrgende balanyń densaýlyǵyna zaqym kelgen. Keıin  týylǵanda bir aıaǵynda kemistik paıda bolady. Tili de kúrmelip, durys sóıleı almaıdy eken. Alaıda bul qıyndyqtar kelinshekke sabaq bolmaǵan.

«Ol oqyp júrgende aldanyp qaldy. Kúnnen kúnge ishi ósip, aýyratynyn aıtty. Aǵasy aýyldyń dárigerine aparyp edi, ishindegi bala ǵoı depti. Balanyń ákesi kim ekenin sol kúıi bilmedik. Odan keıin turmysqa shyqpaı, taǵy bosanyp aldy. Taǵy da ul boldy. Biraq oǵan qaraýdan bas tartyp, artynsha bireýge berip jiberdi. Sóıtip júrip jaman jolǵa túsip ketti. Shymkenttegi temir jol vokzalyn jaǵalap júrdi. Aqyl aıtsaq, eki aǵasyn da, meni de tyńdamady. Sonyń kesirinen taǵy da ekiqabat bolyp, qyz bosanyp aldy. Ol qolynda», - deıdi Sandýǵash Joldasbekova.

Naǵashy jeńgesi Asyldyń týylǵannan naǵashylarynyń úıinde óskenin aıtady. Jasy jetige tolsa da mektepke barmapty. Óıtkeni sheshesi densaýlyǵynda kináraty bar balasyn aıaqqa tusaý boldy dep, qabyldamaı qoıǵan. Onyń ústine jetkinshek  dáret syndyryp qoıa beredi eken. Qansha ursa da, únemi anasyn surap júretin kórinedi.  Al, anasy balasyn ózekten teýip, únemi uryp-qorlap kelipti.

«Sol dáretke otyryp qoıa beredi dep saraıǵa qamap qoıyp, keseýmen sabap júrdi. Men oǵan qoı, balany urma, ol da ishińnen shyqqan perzentiń ǵoı desem, «aralaspańdar, men bul baǵala ishim jylymaıdy» dep, bizge boı bermedi. Sóıtip ınternatqa ótkizem dep júrdi. Keıin Túrkistanda qymyz, qymyran satyp júrdi. Sol jerdiń qojaıynyna ınternat pa, balalar úıin ba taýyp, sóılesińizshi, balamdy sonda ótkizem dep aıtypty. Ol maqul degen. Sóıtip júrgende ol balasyn ózimen birge Shymkentke alyp ketti. Onda ápkesi turady», - dedi naǵashy jeńgesi.

Ápkesiniń úıinde júrip ol balasynyń túgin qaldyrmaı  sabap tastaǵan. Aýyr soqqylardan bala esinen tanyp, jerge qulapty. Sol kezde ǵana bezbúırek ana perzentin dárigerlerge alyp barǵan. Asyldyń soqqyǵa jyǵylǵanyn naǵashylary aýyldaǵy meıirbıkeden estipti. Sol kúni keshkisin Aqmonshaq Battalǵazıeva týystaryna habarlasyp, ol jaǵdaıdy «balam baıqaýsyzda qulap qaldy» dep túsindiripti.

«Ápkem ekeýmiz Temirlandaǵy aýrýhanada júrmiz. Asyl basymen qulap, jansaqtaý bóliminde jatyr. Júrgenime úsh saǵat boldy, endi qaıtaıyn dep jatyrmyn dedi. Keıin balasyn uryp, sabaǵanyn dárigerlerden estidik. Estip, úndemeı otyra almadyq. Kelesi kúni kúıeýimiz ekeýmiz bardyq. Barsaq, úıinde eken. Balany nege sonsha uryp, qorladyń desek: «Dáret syndyryp qoıa beredi, sosyn kókiregine ıne tyqtym, betine ystyq shaı quıyp kúıdirdim, taıaqpen sabadym», - dedi. «Erteń sottalyp ketemin dep qoryqpaısyń ba», - dep edim, «sottalatynymdy sizden jaqsy bilemin» dep jaýap berdi. Ol eshteńeden qorqyp otyrǵan joq. Men aýrýhanaǵa úsh ret baryp, dárigermen jolyqtym. «Balanyń jaǵdaıy nashar, sheshesi ony oılap jatqan joq, tipti kelmedi», - dedi. Qaıynsińlim ol balanyń maǵan keregi joq dep otyr», - deıdi Sandýǵash Joldasbekova.

Al, týǵan aǵasy Baqdáýlet Battalǵazıev qaryndasynyń bul áreketin túsinbeı otyrǵanyn aıtady. Munyń barlyǵy betimen ketkenniń saldary dep túsindiredi. 

«Ol qyzymyzdyń bir shetinen erkeligi de bar, bir shetinen aqyl-esiniń jetispeıtindigi de bar. Úıdiń kenje qyzy. Bastapqy kezde onyń balasy bizdiń úıimizde bolǵan. Alaıda bala emes pa, bizdiń úıdiń balalarymen syıysa almady. Sodan anasy ózi qaraımyn dep alyp ketken. Sońy osyndaı jaǵdaı bolyp jatyr, biz ol jaǵdaıdy tek keıin estip bildik. Ne úshin bulaı istediń dep edik, balany qabyldamaımyn dep aıtty», - deıdi Baqdáýlet Battalǵazıev.

Bul kúnde jetkinshek oblystyq balalar aýrýhanasynda jatyr. Dárigerler «bas súıegi synyp, mıy shaıqalǵan»  degen  qorytyndy jasaǵan. Qala berdi, denesiniń biraz jeri kúıip qalypty. Úsh aptadan astam ýaqyt es-tússiz jatqan Asyldyń qazir beti beri qarady. Ol azdap bolsa da qımyl jasap, aq halattylardyń aıtqan sózin oryndaı bastaǵan. Aldaǵy dúısenbige deıin jansaqtaý bóliminde em qabyldaıdy. Bári jaqsy bolsa jalpy palataǵa aýystyrylmaq. Odan keıin tıisti uzaq em qabyldap, reabılıtatsııa alatynyn aıtady. Qalaı bolǵanda da óńirdiń tártip saqshylary 26 jastaǵy kelinshektiń ústinen qylmystyq is qozǵap, tergeý amaldaryn júrgizýde. Taǵaıyndalǵan sot-medıtsınalyq saraptamalardyń qortyndysyna sáıkes, ol áıelge qatysty shara qoldanylatynyn aıtady.

Eske salaıyq, jýyrda 7 jasar balanyń es-tússiz, aýyr halde aýrýhanaǵa túskeni málim bolǵan. Ol kezde óńirdiń tártip saqshylary jetkinshekti týǵan anasy sabap tastaǵan degen kúdik bar ekenin aıtqan edi. Keıinnen osy oqıǵaǵa baılanysty Qylmystyq kodekstiń  107-baby «Densaýlyqqa qasaqana aýyrlyǵy ortasha zııan keltirý» baby boıynsha qylmystyq is qozǵaldy. Sotqa deıingi tergeý bastalyp ketti. Balaǵa qatysty birqatar sot-medıtsınalyq saraptamalar taǵaıyndaldy. Kúdikti retinde balanyń 26 jastaǵy anasy anyqtalǵan bolatyn.