OQO týrızmdi damytýdy Túrkııadan úırenedi
Oblys ákimdiginiń baspasóz qyzmetiniń habarlaýynsha, Ońtústiktegi týrızm salasynyń mamandaryn oqytýǵa kelgen delegatsııa múshelerimen bolǵan otyrysta taraptar aımaqtaǵy atalmysh salany damytý jaıyn talqylady.
Basqosýda óńir basshysy oblystyń týrıstik áleýetiniń joǵary ekenin aıtyp, túrkııalyq týrızm salasy bilgirleriniń bul salada mol tájirıbesi baryn jetkizdi.
«Biz týysqan túrik aǵaıyndarmen tájirıbe almasýǵa nıettimiz. Óıtkeni, Túrkııada sońǵy ýaqytta týrızm salasy jaqsy damyp keledi. Mysal keltirsek, keıingi jyldary Túrkııaǵa 40 mln týrıst kelgen. Antalııa men Alanııanyń ózinde ınfraqurylymy jolǵa qoıylǵan jáne qyzmet kórsetý deńgeıi joǵary 1 500-den astam úsh juldyzdy, tórt juldyzdy jáne bes juldyzdy qonaq úıler bar. Sondyqtan, bizge olardyń tájirıbesin paıdalaný kerek», - dedi ákim.
Ońtústik Qazaqstan oblysyndaǵy týrıstik fırmalardyń qyzmet kórsetý deńgeıin jaqsartý úshin aptalyq oqý kýrsyn ótkizýge kelgen túrik delegatsııasy týrıstik operatorlardyń biliktiligin jetildirý, meıramhana bıznesine baýlý jáne qonaq úı menedjmentine úıretý taqyryptarynan turatyn úsh kezeńdi sheberlik dáristerin ótkizbek. Oǵan 70-ten astam týrızm salasyndaǵy mamandar qatysady.
Aıta ketý kerek, atalǵan oqý kýrsy «Ońtústik Qazaqstan oblysynyń týrızm ındýstrııasyn damytý qaýymdastyǵy» men Túrkııanyń týragenttikter qaýymdastyǵy jáne týrıstik aqparattyq ortalyǵynyń kelisimi nátıjesinde júzege asyrylyp otyr.
Aptalyq oqytý jumystarynan soń, kýrsty sátti aıaqtaǵan qatysýshylarǵa arnaıy sertıfıkattar tabys etilmek.