OQO turǵyny jalǵan jer aktilerin jasaǵan

ShYMKENT. QazAqparat - Ońtústik Qazaqstan oblysynda alaıaq aýyl turǵynyń jerin tartyp alyp, oǵan qaıta 7 mln teńgege satpaq bolǵan. Onyń bul qylmystyq áreketine aýdandyq jer kadastr mamany qolǵabys etken, dep habarlaıdy QazAqparat tilshisi.

Saıram aýdandyq prokýratýrasynyń málimetinshe, Qarabulaq aýylynyń turǵyny Nemadjan Shadıev jer kezeginde turyp, 2008 jyly 22 sottyq jer telimin alǵan. Ol jerge úı turǵyzyp, qora-jaıyn salyp bolǵanda jerdiń taǵy bir ıesi paıda bolypty. Shymkent qalasynyń turǵyny sharýaǵa jerdiń qujattaryn kórsetip, ony bosatýyn talap etken. Ne bolmasa «aqysyna 7 mln teńge beresiń» dep  shart qoıady. Onsyz da qurylysqa qyrýar qarajat jumsaǵan aýyl turǵyny ne isterin bilmeı, aýdandyq prokýratýraǵa aryzdanypty. Saıramdyq qadaǵalaýshy organ ókilderi Nemadjan Shadıevtyń qujattaryn teksergen. Іstiń mánisimen tanysqan zań qyzmetkerleri qujattardyń túpnusqany  tekserý úshin oblystyq muraǵatqa suranys berip, qajetti qaǵazdardy alǵyzady.

Nátıjesinde daýǵa aınalǵan jer Nemadjan Shadıevke tıesili ekeni, al alıaqtyń qujattary jalǵan bolyp shyqqan«Saıram aýdandyq prokýratýrasy júrgizgen tekserý nátıjesimen jer telimine qatysty jalǵan memlekettik aktiniń kúshin joıý týraly aýdandyq sotqa talap aryz berildi. Talap aryz tolyǵymen qanaǵattandyryldy. Alaıda sottyń sheshimin de zańsyz dep tapqan kisiler boldy. Qarsy tarap oblystyq sotqa, Joǵary sotqa talap aryz túsirdi. Biraq ta ol talap aryzdar qaraýsyz qaldyrylyp, Saıram aýdandyq sotynyń sheshimi óz kúshine endi. Bul kisige zań aıasynda berilgen jeri ózinde qaldy», - deıdi Saıram aýdanynyń prokýrory Orazaly Abdramanov.

Prokýrorlardyń sózinshe, aýdandyq jer kadastr bóliminiń mamany men alaıaq Qarabulaq aýylyndaǵy taǵy on úıge jalǵan meleket akti jasaǵan. Qazirgi tańda ol ekeýiniń ústinen qylmystyq is qozǵalyp, tergeý sharalary júrgizilýde. Qylmystyq iske burynǵy aýyl ákiminiń de qatystylyǵy tekserilip jatyr.