OQO turǵyndarynyń banktegi salymdary 303,7 mlrd teńgeni qurady
ShYMKENT. QazAqparat - Ońtústik Qazaqstan oblysynda ústimizdegi jyldyń aqpan aıynyń qorytyndysy boıynsha turǵyndardyń bankke salǵan depozıtteriniń jalpy kólemi - 303,7 mlrd teńgeni qurady. Búgin bul týraly OQO óńirlik kommýnıkatsııalar qyzmetinde ótken brıfıngte QR Ulttyq bankiniń oblystyq fılıalynyń dırektory Ánýar Botanbekov málim etti, dep habarlaıdy QazAqparat tilshisi.
Ánýar Amangeldiulynyń aıtýynsha, shetel valıýtasyndaǵy salymdar - 7,8 paıyzǵa qysqarsa, ulttyq valıýta salymdary - 5,4 paıyzǵa ósken. Al, bıylǵy qańtar-aqpan aılarynda teńgeniń baǵamy bir AQSh dollary úshin 320,30 teńge bolyp, ulttyq valıýta 3,6 paıyzǵa nyǵaıǵan. Sondaı-aq, QR Ulttyq bankiniń oblystyq fılıaly óńirdegi 239 valıýta aıyrbastaý pýnkteriniń qyzmetin monıtorıngileýdi júzege asyrady.
«2018 jyldyń alǵashqy eki aıynda oblysta AQSh dollaryn satyp alý kólemi byltyrǵy jyldyń osy kezeńimen salystyrǵanda 1,20 paıyzǵa ulǵaıyp otyr. Eýrony satyp alý kólemi - 14,47 paıyzǵa azaıyp, Reseı rýblin satyp alý - 12,14 paıyzǵa ulǵaıǵan», - dedi Ánýar Amangeldiuly.
Aıta keterligi, Ulttyq banktiń altyn valıýta rezervteri aqpannyń sońynda 31,4 mlrd AQSh dollaryn qurap, jyl basynan beri 2,2 paıyzǵa ósti. Ulttyq qordyń shetel valıýtasyndaǵy aktıvteri - 59,4 mlrd AQSh dollaryna baǵalanyp, qazirgi tańda jalpy halyqaralyq rezervter - 90,8 mlrd AQSh dollaryn quraǵan.
Jalpy, qańtar aıynda jalpy Qazaqstan boıynsha jańa kredıtterdi berý kólemi - 830 mlrd teńgege jetti. Al Ońtústik Qazaqstan oblysynda qańtar-aqpan aılarynda jańa kredıtterdi berý kólemi - 59,2 mlrd teńgeni qurap, byltyrǵy jyldyń osy kezeńimen salystyrǵanda 46 paıyzǵa kóbeıip otyr.
