OQO turǵyndary Májilis depýtattarynan áleýmettik máselelerdi sheshýdi surady
ShYMKENT. QazAqparat - Qazaqstan Respýblıkasy Parlament Májilisiniń depýtattary, «Nur Otan» partııasy fraktsııasy músheleri Ábdimanap Bekturǵanov, Erjan Qudaıbergen, Sáken Qanybekov pen Mansurhan Mahambetovter oblysqa jasaǵan jumys sapary barysynda Qazyǵurt aýdanynda bolyp, birqatar kezdesýler ótkizdi. Jeke azamattardy qabyldap, máselelerin tyńdady, dep habarlaıdy QazAqparat HAA tilshisi.
Aýdan ákimdiginde ótken qabyldaýǵa 9 azamat qatysyp, kókeıdegi máselelerin kóterdi. Olardyń qatarynda aýyldardy mektep jáne turǵyn úımen qamtamasyz etý, ınfraqurylymdardy damytý sııaqty ózekti problemalar bar. Máselen, Qazyǵurt aýdanyna qarasty Qaqpaq aýylynyń turǵyny Jumabek Aıtekov 700 gektar jaıylym jerdi osy kúnge deıin paıdalana almaı otyrǵanyn aıtady. Óıtkeni Ózbektanmen shekaralas aýmaqta ornalasqan jerler áli kúnge zańdastyrylmaı, aýyl turǵyndaryna berilmeı otyr eken. Al, ózbek elinen keletin Zah Keles kanalynda jyldar boıy tazalaý jumystary júrgizilmegendikten qamys basyp ketken. Sý nasostary isten shyǵý saldarynan sharýashylyqtarǵa sý jetispeıdi dep otyr. Aıtylǵan eki máselege depýtat Sáken Qanybekov jaýap berdi. Onyń sózinshe shekaradaǵy jaıylymdyq jerler áli ratıfıkatsııalanbaǵan. Áli kúnge aýdannyń jer qoryna ótpegen. Eki el tarapynan jer bólý qujattaryna qol qoıylyp, zańdastyrylǵan soń ǵana bul másele naqty sheshimin tabatyn bolady. Al Qazyǵurt aýdany úshin mańyzdy sanalatyn kanaldyń máselesin elimizdiń Sý komıtetinen jetkizetinin aıtty. Sebebi, aýyl arasyndaǵy kanaldar men aryq-atyzdardy talapqa saı ustaý osy komıtettiń quzyretine kiredi. Ondaǵylar óz mindetterin durys atqarmasa halyq qalaýlylary Úkimetke deıin máseleni jazamyz dep ýáde etti.
Budan bólek, qoǵamdyq qabyldaýǵa kelgender aýylsharýashylyq qarajatyn nesıege beretin bankter aýdan ortalyǵynan ashylsa, áleýmettik salalarǵa qatysty tender ótkizý merziminen keshiktirilmese degen usynystaryn ortaǵa saldy. Aýyldaǵy maldyń terisi men júnin qabyldaıtyn nysandar jumys istep, jemis jıdekter men kókónister saqtaıtyn qoıma nemese shyryn shyǵaratyn tsehtar ashýdy surady. Bazbiri EGOV elektrondy portalynyń jumysyn jeńildetý arqyly qoljetimdi bolsa degen ótinishin aıtsa, Smaıyl Tashqaraev degen azamat aýyz sý jetpeıtinin jetkizdi.
Aıtylǵan problemalarǵa qatysty depýtattar jeke-jeke toqtalyp, jaǵdaıdy jan-jaqty túsindirýge tyrysty.
«Halyqtyń tarapynan qoıylyp jatqan máselelerdi biz zerttep, erteńgi kúni jumysqa shyqqan kezde toptastyryp, respýblıkalyq deńgeıde májiliste kóterip, sheshý jaǵyn qarastyramyz. Olardyń arasynda negizinen aýyz sý problemasy kóp aıtylýda. Bul másele keı jerlerde oblystyq deńgeıde sheshilse, endi biri Respýblıkalyq deńgeıde sheshý qajet. Ondaı máselelerdi biz respýblıkalyıaq deńgeıde sheshýdi oılastyramyz», - dedi depýtat Sáken Qanybekov.
