OQO tótenshe jaǵdaılar qyzmetkerleri sý tasyǵan aımaqta qutqarý sharalaryn bastap ketti
ShYMKENT. QazAqparat - Ońtústik Qazaqstan oblysynyń tótenshe jaǵdaılar qyzmetkerleri sý tasqyny bolǵan aımaqta qutqarý sharalaryn bastap ketti. Olar Shyǵys Qazaqstan oblysynyń Shemonaıha qalasy men Glýbokoe aýdanyndaǵy mektepterge ornalasyp, osy óńirlerde avarııalyq-qutqarý jumystaryn júrgizýde, dep habarlaıdy QazAqparat tilshisi.
OQO-nyń TJD-i baspasóz qyzmetiniń málimetinshe, jedel-qutqarý jáne avarııalyq-qutqarý jasaqtary men órt sóndirýshiler úsh topqa bólinip, Shemonaıhadaǵy sý basqan kóshelerde sý sorǵytý jumystaryn júrgizýde. Jergilikti tótenshe jaǵdaılar jáne órt sóndirý qyzmetkerlerimen birlesip, Chapaev pen Povstancheskaıa aýdanynda 10 quralmen 4245 tekshe metr sýdy sorǵytyp aldy. Rechnaıa, Naberejnaıa, Kazahstanskaıa kóshelerindegi 20 úıdiń aýlasyn jáne jertólelerin sýdan tazartty. Dál osyndaı jumystar Glýbokıı, Progress, Predgornyı jáne Beloýsovka aýyldarynda da júrgizilip, bas-aıaǵy 6498 tekshe metr sý sorǵytyldy.
Budan bólek Ońtústik Qazaqstan oblysynyń №23 jáne 24-shi órt sóndirý bólimderiniń qyzmetkerleri shyǵystaǵy tórt aýdanda sý bógetterin bekitý sharalaryn atqarǵan. Progress kentindegi bógetti bekitýge 700 qap qum qoldanylǵan. Apatty aımaqtaǵy avarııalyq-qutqarý jumystary áli de jalǵasatyn bolady deıdi ońtústiktiń qutqarýshylary.
