OQO: Tólebı aýdanynda ótken jarysta shardaralyq jas boksshylar júldemen oraldy
ASTANA. QazAqparat - OQO Tóle bı aýdanyndaǵy Kóksáıek aýylynda Qazaqstan Respýblıkasynyń Bilim berý isiniń úzdigi, Semeı ıadrolyq synaq polıgonyna qatysýshy Asqar Esimbekovti eske alýǵa arnalǵan bokstan ІІ respýblıkalyq týrnır ótti, dep habarlaıdy aýdan ákimdiginiń baspasóz qyzmeti.
Baıraqty básekege 2002-2003 jáne 2004-2005 jyldary týǵan jasóspirimder qatysty. Osynaý kileń myqtylar jınalǵan úlken týrnırge Shardara aýdandyq №2 balalar men jasóspirimder sport mektebiniń sportshylary da qatysyp, baqtaryn synap keldi.
Rıng tórinde óner kórsetken jigitterimiz jerge qaratpady. Birneshe salmaq dárejesinde júldeli oryndardy ıemdenip, aýylǵa abyroımen oraldy. Júlde alǵan jas boksshylarymyzǵa keler bolsaq, 30 keli salmaqta qolǵap túıistirgen Meıirbek Smaǵul ІІІ oryndy, 32 kelide rıngke shyqqan Rınat Jaılybaı ІІІ oryndy, 36 kelide synǵa túsken Dımash Noǵaıbek ІІ oryndy, 40 kelide synǵa túsken Nurjan Serikbaı ІІІ oryndy jáne osy salmaqtaǵy Nurdáýlet Seıdahmet ІІ oryndy, 42 kelidegi Almat Ájbenbek ІІІ oryndy, 44 kelidegi Oljas Aıdar ІІІ oryndy, 52 kelidegi Arsen Bazarbaı ІІІ oryndy, osy salmaqtaǵy Marat Tursynbek ІІ oryndardy baǵyndyryp, qorjynǵa júlde saldy.
