OQO: Tólebı aýdanynda 480 otbasy jańa baspana aldy
ShYMKENT. QazAqparat - Ońtústik Qazaqstan oblysynyń Tóle bı aýdanynda 480 otbasy qoljetimdi turǵyn úıge ıe bolǵan. Sondaı-aq, Leńgir qalasynda 40 jáne 20 páterli eki turǵyn úıdiń qurylys jumystary júrgizilýde. Bul týraly atalǵan Tóle bı aýdanynyń ákimi Buharbaı Parmanov óńirlik kommýnıkatsııalar qyzmetinde ótken baspasóz máslıhatynda málimdedi, dep habarlaıdy QazAqparat tilshisi.
Ákimniń sózinshe, Tóle bı aýdanynda týrızm salasy da qarqyndy damyp keledi. Atalǵan saladan ótken jyly 6,6 mln. teńge salyq túsip, kelýshi týrıster sany 45 myńǵa jýyqtaǵan. Aldaǵy ýaqytta demalys oryndarynyń qyzmet kórsetý sapasy joǵarylaı túsetin bolady. Al, jalpy kásipkerlik sýbektileriniń sany - 7232, al kásipkerlik salasynda jumys isteıtinder sany - 15483 adamǵa jetken. Sondaı-aq, shaǵyn jáne orta bıznes salasynda 33 mlrd 279 mln teńgeniń ónimi óndirilip, 532 mln teńge kóleminde bıýdjetke salyq túsken.
«Bıznestiń jol kartasy-2020» memlekettik baǵdarlamasy aıasynda jalpy quny 815 mln. teńgeni quraıtyn 9 joba maquldanyp, jańadan 103 jumys orny ashylǵan. «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasymen qysqa merzimdi kásiptik oqytýǵa 18 mamandyq boıynsha 504 azamat oqýǵa joldanyp, onyń 124-i turaqty jumysqa ornalasty. Baǵdarlamanyń ekinshi baǵyty aıasynda 97 azamat jalpy somasy 206,1 mln teńge kóleminde shaǵyn nesıe alǵan. Nátıjesinde 120-ǵa jýyq jańa jumys orny ashyldy. Baǵdarlamanyń úshinshi baǵyty sheńberinde turaqty jumysqa 1800-den astam adam ornalasty», - dedi Buharbaı Rysqululy.
Budan bólek, taýly aýdanda «Órleý» jobasymen 586 otbasy qamtylyp, barlyǵy 275501 myń teńge qarjy taǵaıyndalǵan. Infraqurylym boıynsha óńirdegi máseler sheshimin taýyp keledi.
«Aýdandy kógildir otynmen qamtý deńgeıi qazirgi tańda 82 paıyzdy quraıdy. 2020 jylǵa qaraı 100 paıyzǵa jetkizý mejelengen. Búginde eldi mekenderdi aýyz sýmen qamtý kórsetkishi 92,7 paıyz, aǵymdaǵy jyly tolyǵymen aýdandy taza aýyz sýmen qamtý josparlanýda. Ótken jyly 60,1 shaqyrymdy quraıtyn 31 avtokólik joldaryna jóndeý jumystary júrgizildi», - dedi Buharbaı Parmanov.
