OQO: «Táýelsizdik - uly dala urpaqtaryna amanat» taqyrybynda semınar ótti

ShYMKENT. QazAqparat - El Táýelsizdiginiń 25 jyldyq merekesine oraı Ońtústik Qazaqstan oblysynyń Otyrar aýdanyna qarasty Eski Shilik aýylynda «Táýelsizdik - uly dala urpaqtaryna amanat» taqyrybynda semınar bolyp ótti, dep habarlaıdy aýdan ákimdiginiń baspasóz qyzmeti.

Semınarǵa aýdan ákiminiń orynbasary Ryskeldi Álish qatysyp, shırek ǵasyrlyq el egemendiginiń mereıli merekesimen kópshilikti quttyqtady. Jıynda S.Qurtaev mektebiniń oqýshylary óz shyǵarmashylyq taqyryptaryn 30 jyl burynǵy zulmatty Jeltoqsan oqıǵasyn sahnalyq kórinisterimen jetkizdi. Qaırattyń ultshyldylyǵyn, alańǵa jınalǵan jalyndy jastardyń sherýin, sot sheshiminiń ádiletsizdigin, Qaırat pen anasynyń qoshtasý sáti júrekti syzdatty. Jeltoqsan oqıǵasyna qatysqan bastaýysh synyp muǵalimi Raıa Mahanova óskeleń urpaqqa azattyqtyń aq tańy babalar amanaty ekenin aıtyp, qazaq jastaryn qyrǵynǵa ushyratqan jeltoqsannyń yzǵarly jeline keýde tosqan batyr aǵalar men apalardyń ómirin baıandady.

Semınar odan ary muǵalimder men oqýshylar ázirlegen ashyq sabaqtarǵa ulasyp, aýdandaǵy ózge bilim berý mekemelerinen kelgen ustazdar qaýymy sabaqtarǵa qatysyp, tájirıbe almasty. Óskeleń urpaq tarıhty jaqsy bilip ósýi shart. Táýelsizdiktiń ońaılyqpen kelmegenin túsinip, ony qasterleý kerektigin bilgenderi abzal. Óıtkeni, Táýelsizdik -  eń uly qundylyǵymyz.