OQO: Syrdarııada sýdyń arnasynan asýy múmkin jerlerge bógetter salynýda

Saqtyq sharalary Ózbekstan tarapynan kóp mólsherde sý keledi degen soń qolǵa alynyp otyr, dep habarlaıdy «QazAqparat» HAA tilshisi.

Sebebi, buǵan deıin  Ózbekstan gıdrometinen kelgen eskertýge  sáıkes, sáýirdiń 22-24 kúnderi Syrdarııa ózenine  sekýndyna 1,8 - 2  mln tekshe metr sý keledi degen boljam aıtylǵan bolatyn. Osy habardan keıin kúngeıdiń tótenshe jaǵdaılar qyzmeti Syrdarııa ózeni ótetin Arys, Otyrar, Shardara aýdandary men Túrkistan qalasynda jaǵalardy bekitý, bógetter salý sharalary júrgizilýde. Oblystyq Tótenshe jaǵdaılar departamentiniń bastyǵy Nurbolat Derbisovtyń sózinshe, qaýip ásirese Shardara aýdanyna qarasty Sútkent eldi mekenine tónýi múmkin.

«Biz qazir Syrdarııa ózeninde sý deńgeıi kóterilse qansha eldi mekendi sý alyp ketýi múmkin ekenin eseptep, sol aýyldardyń turǵyndaryn eskertip jatyrmyz. Tipti  kezekshilikter qoıylǵan.  Qazir Sútkentte 4 myńǵa tarta qapr qoıylyp, saqtyq sharalaryna jeke quramnan 36 adam jumyldyryldy. Ol jerde, ásirese 9 turǵyn úı ózenge jaqyn ornalasqan. Sý kele qalǵan jaǵdaıda ondaǵy 51 adam qaýipsiz jerge kóshiriledi. Otyrar aýdanynda buǵan deıin sý jaıylǵan soń, kóp jerlerde bógetter salynǵan. Sonymen qatar tótenshe jaǵdaı  qyzmetkerlerimen jáne  jergilikti ákimdikterdiń adamdarymen kezekshilikter qoıylyp, sol jerlerdi qadaǵalap, qarap otyr. Túrkistanda da solaı. Kesheden beri qaýipsizdik sharalaryna sáıkes bóget retinde 4 myńǵa tarta qap qoıylyp, jaǵalar bekitilýde. Arys aýdanynda ózennen tómen ornalasqan aýyldyń sany ekeý ǵana. Biraq olardy sý basý úshin Syrdarııa ózenindegi sýdyń deńgeıi  sekýndyna 1,8 myń tekshe metr sý bolýy kerek»,-dedi Nurbolat Derbisov.

Al, ázirge Shardara sý qoımasynyń sıymdylyǵy 5,2 mlrd tekshe metr bolsa, qazir onda 4 mlrd 886 mln (95 paıyz) tekshe metr sý bar. Sý kóbeıgen jaǵdaıda qosymsha Arnasaı men Kóksaraı sý qoımalaryna sý jiberiledi dep boljanýda.