OQO sportshylary jyl basynan beri 265 medalge qol jetkizdi
ShYMKENT. QazAqparat - Ońtústikqazaqstandyq sportshylar jyl basynan beri Azııa chempıonattary men kýboktarynda 78 altyn, 53 kúmis jáne 42 qola medal jeńip aldy. Al, Álem chempıonattary men kýboktarynda 34 altyn, 21 kúmis jáne 37 qola medalge ıe boldy. Bul týraly Óńirlik kommýnıkatsııa ortalyǵynda ótken baspasóz jıynynda oblystyq dene shynyqtyrý jáne sport basqarmasynyń basshysy Álibek Nurtaev málimdedi.
Ol óńirdegi sport salasynyń jetistikterin memlekettiń kórsetip otyrǵan qoldaýymen baılanystyrady. Máselen 2017 jyly oblysta 95 memlekettik menshiktegi sporttyq mekemeler men kásiporyndar tirkelgen. Onyń 30-y oblystyq, 65-i qalalyq jáne aýdandyq mekemege jatady. Al, sporttyq nysandardyń sany byltyrǵy jyly 5 470-ke jetse, 2016 jyly 5 350 bolǵan.
«Elbasy halyqtyń salaýatty ómir salty týraly aıtqanda únemi buqaralyq sportty damytý kerektigine erekshe toqtalady. Mine, osy tapsyrmany oryndaý maqsatynda oblys aýmaǵynda 4 614 is-shara ótkizilip, oǵan 540 myńnan astam adam qatysty. Al, aýyldy jerlerde 2 884 sporttyq is-shara ótkizilip, 330 myńnan astam azamat qamtyldy. Nátıjesinde 2017 jyly oblysta sportpen turaqty túrde shuǵyldanýshylar sany 770 myńǵa jýyq janǵa jetip, jalpy halyqtyń 26 paıyzyn qurady», - dedi Álibek Nurtaev.
Búginde oblys kóleminde 38 olımpıadalyq, 25 olımpıadalyq emes sport túrleri damytylýda. Osyndaı júıeli jumystardyń nátıjesinde byltyrǵy jyly jerlesterimiz 1 189 medaldi jeńip alsa, 2016 jyly 1 185 medalge ıe bolǵan. Osyndaı kórsetkishterimen ońtústik óńiri respýblıkada kóshbasynda keledi.
