OQO sportshylary jyl basynan 1235 medal jeńip alǵan
ASTANA. QazAqparat - Ońtústik Qazaqstan oblysynyń sportshylary 2016 jyldyń 9 aıynda túrli sport túrlerinen Qazaqstan Respýblıkasynyń chempıonattary men birinshilikterine qatysyp, 390 altyn, 384 kúmis, 377 qola medalǵa qol jetkizse, Azııa chempıonattarynda 19 altyn, 15 kúmis jáne 19 qola medalge ıe boldy.
Al osy merzim aralyǵynda oǵlandarymyz túrli sport boıynsha ótken Álem chempıonattary men Kýboktarynda 16 altyn, 8 kúmis jáne 7 qola medal jeńip aldy. Osylaısha ońtústikqazaqstandyq sportshylar jyl basynan beri túrli sport túrinen 1235 medalǵa qol jetkizdi. Bul Elbasynyń qazaqstandyq sportqa kórsetilip jatqan qoldaýy men sporttyń damýyna úlken mán berilýiniń arqasy dep bilemiz.
Eske salaıyq, sońǵy bes jylda respýblıka aýmaǵynda qolǵa alynǵan qazaq kúresinen «Qazaqstan Barysy» jobasy sheńberinde osy jyly 3 shilde kúni Astana qalasynda ótken respýblıkalyq aqtyq saıysta ońtústikqazaqstandyq sportshy Jumanazar Ersultanov «Qazaqstan Barysy - 2016» saıysynyń 2-oryn ıegeri atandy. Al 2016 jyldyń 5-21 aralyǵynda XXXI jazǵy Olımpıada oıyndarynda aýyr atletıkadan Jazıra Japparqul ІІ oryndy ıemdense, dzıýdodan ІІІ oryndy Galbadrah Otgontsetseg jeńip alǵan bolatyn.
Búginde óńirde halyqaralyq dárejedegi 32 sport sheberi, Qazaqstan Respýblıkasynyń 124 sport sheberi, 713 sport sheberine úmitker daıyndaldy.
«Ońtústik Qazaqstan oblysynan sport túrleri boıynsha Qazaqstan Respýblıkasynyń ulttyq qurama komandasynyń negizgi quramyna 411 sportshy, jastar quramasynda 415 sportshy, jasóspirimder quramasynda 263 sportshy, jalpy 1089 sportshy bekitilgen. Sondaı-aq, sport túrleri boıynsha ulttyq qurama sapyna engen 119 sportshyǵa aı saıyn stıpendııa tólenýde», - dep habarlanǵan OQO ákimdiginiń baspasóz qyzmeti taratqan málimette.
