OQO sportshylary bıylǵy jyldy jemisti qorytyndylap keledi
ShYMKENT. QazAqparat - Jyl basynan bergi 11 aıda Ońtústik Qazaqstan oblysynyń sportshylary Qazaqstan chempıonattary men kýbok oıyndarynan 394 altyn, 389 kúmis jáne 385 qola medal jeńip aldy, dep habarlaıdy oblys ákimdiginiń baspasóz qyzmeti.
Sondaı-aq, Azııa chempıonattary men kýbok jarystarynda 41 altyn, 41 kúmis, 35 qola enshiledi. Al, álem chempıonattary men kýboktary jolyndaǵy saıystarda jerlesterimiz 45 altyn, 19 kúmis jáne 26 qola medalǵa ıelik etti. Bıyl bapkerler 35 halyqaralyq dárejedegi sport sheberin, 154 sport sheberin, 816 sport sheberligine úmitkerlerdi daıarlady.
Qazaqstannyń eresekter, jastar jáne jasóspirimder quramasyna jalpy 1089 sportshy qabyldandy. «Qazaqstan barysy» týrnırinde Jumanazar Ersultanov ekinshi orynǵa ıelik etti. Rıo Olımpıadasynda Jazıra Japparqul - kúmis, Otgontsetseg Galbadrah qola medal oljalady. Osy jetistikterge qarap jyldy tabysty ótti deýge negiz bar.Táýelsizdik alǵaly oblysta sport keshenderi kóbeıdi. Halyqaralyq talaptarǵa saı «Muz saraıy», jeńil atletıka maneji, sý sporty kesheni, joǵary sport sheberligi mektebiniń ǵımaraty, eskek esý bazasy jáne ózge de kóptegen sport ortalyqtary turǵyndarǵa qyzmet kórsetýde. Búginde óńirdegi sport nysandarynyń sany 5224-ke jetti. Oblystyq deńgeıdegi 28 sport mektebi, qalalyq jáne aýdandyq deńgeıdegi 59 sport mektebi jumys istep tur. Endigi meje - 2018 jyly Indonezııada ótetin jazǵy Azııa oıyndary men 2020 jyly uıymdastyrylatyn Tokıo Olımpıadasy. Azat eldiń arǵymaqtaı alymdy, arystandaı aıbatty oǵlandary osy básekelerge daıyndyqty bastap ketti.
