OQO soty: Depýtat pen keńesshiniń ólimine sebepker júrgizýshi qashyp júr
ShYMKENT. QazAqparat - Túrkistanda jol apatyn jasap, oblys ákiminiń keńesshisi men depýtattyń ólimine sebepker bolǵan júrgizýshige izdeý jarııalandy. Bul týraly búgin Ońtústik Qazaqstan oblystyq sotynda ótken brıfıngte aıtyldy , dep habarlaıdy QazAqparat tilshisi.
Oblystyq sottyń qylmystyq ister jónindegi sot alqasynyń sýdıasy Búrkit Baıdýllaevtyń aıtýynsha, eki aı boıy aýrýhanada emdelip shyqqan júrgizýshi Beıbit Ómirbaev qazir sottan qashyp júr.
Esterińizge salaıyq, Ońtústik Qazaqstan oblysy ákiminiń keńesshisi Seıit Ertaı men depýtat Qamytbek Aıtóreevter qaza tapqan jol apaty 23 shildede Shymkent-Samara tas jolynyń 107 shaqyrymynda bolǵan edi. Tergeý barysynda jol apaty jeńil kólik júrgizýshisiniń muqııatsyzdyǵynan oryn alǵany anyqtaldy. https://kaz.inform.kz/news/oko-da-kolik-apatynan-deputat-pen-akimnin-kenesshisi-kaza-boldy_a3048200
«Júrgizýshi Beıbit Ómirbaevqa Qylmystyq kodekstiń 345-baby 4-bóligi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy, abaısyzda eki nemese odan da kóp adamnyń ólimine ákep soqqan is-áreket» boıynsha is qozǵalyp, aıyptaý aktisi Túrkistan qalalyq sotyna túsken. Basty sot talqylaýy 16 qazan 2017 jylǵa taǵaıyndalǵan. Alaıda sotqa aıyptalýshy men jábirlenýshilerdiń zańdy ókilderi kelmegen. Osyǵan baılanysty sot otyrysy taǵy 25 qazanǵa, keıin 31 qazanǵa qaldyrylǵanymen, onda da kelmegen. 7 qarasha kúni taǵaıyndalǵan sot otyrysyna aıyptalýshy kelmegen. Onyń 4-shi ret sotqa kelmeýine baılanysty endi izdeý jarııalandy», - deıdi Búrkit Baıdýllaev.
Sýdıanyń aıtýynsha, júrgizýshi osy ýaqytqa deıin aýyr jaraqat alýyna baılanysty, bas sharasy bostandyqta júrgen. Qazir endi sotqa negizsiz sebeptermen kelmeı otyr. Endi ol izdeý jarııalaý arqyly ustalady. Ary qaraı sottyń aldynda jaýap beretin bolady. Al, qashyp júrýine baılanysty qosymsha aıyp taǵylmaıdy.
