OQO: Shymkentte til bilgirleriniń saıysy ótti

ShYMKENT. QazAqparat - Eldegi úshtuǵyrly til saıasatyn qoldaý maqsatynda «Til daryn» degen ataýmen Ońtústik Qazaqstan pedagogıkalyq kolledjinde bilimdiler saıysy bolyp ótti, dep habarlaıdy qala ákimdiginiń baspasóz qyzmeti.

 Shymkent qalalyq bilim bólimi uıytqy bolǵan sharaǵa shahar aýmaǵyndaǵy bilim oshaqtarynyń 9-shy synyp oqýshylary qatysty. Óz tilin qurmettep, ózge tildiń bárin bilýge bul baıqaýda 44 mekteptiń oqýshysy yntaly ekenderin bildirdi. Úkilegen úmit ıeleriniń bilimin táýelsiz sarapshylar baǵalap, baqylady. Synnan súrinbeı ótken shákirtterge Ońtústik Qazaqstan pedagogıkalyq kolledjinde tegin bilim alýǵa joldama berilmek. 

Aıta keteıik, 17 kásip boıynsha maman daıarlaıtyn oqý uıasy osylaısha kil myqtylardy jınaǵan, talaby taýdaı talanttylardyń ordasyna aınalyp otyr. Bul baıqaýǵa saıdyń tasyndaı iriktelgen talaptylar qatysty. Solardyń biri - №25 mektep-gımnazııasynyń oqýshysy Araılym Oralbekova. Buǵan deıin de talaı baıqaýǵa qatysyp, dara shyqqan.   Ol olımpıadaǵa qatysýynyń basty sebebin alǵan bilimin tekserý, nátıjesin kórýmen, ıaǵnı ózin synaýmen túsindiredi. Alǵa qoıǵan maqsaty da aıqyn. Sonyń biri 3 tildi birdeı jetik meńgergen bilikti maman bolý. Kóp til bilý - kóp eldi taný. Sol jurttyń múmkindigin meılinshe ıgerý. HHІ ǵasyr - oıy erek, bilimi zerekterdiń zamany. Búgingi oqýshy burynǵydaı emes. Osyny túsingen.