OQO: Sheteldik mamandar baýyrǵa ota jasaý tájirıbelerimen bólisti
ShYMKENT. QazAqparat - Ońtústik Qazaqstan oblystyq klınıkalyq aýrýhananyń dárigerleri sheteldik mamandarmen birigip ota jasady, dep habarlaıdy oblys ákiminiń baspasóz qyzmeti.
Osy tájirıbe arqyly olar biliktiligin arttyrýda. Bul joly medıtsınalyq mekemege Ońtústik Koreıadan hırýrgtar kelip, baýyrǵa kúrdeli ota jasaldy. Bul dárigerler oblystyq klınıkalyq aýrýhanaǵa alǵash kelip otyr. Ońtústikkoreıalyq mamandar aqyly hırýrgııa bóliminiń jumysymen jiti tanysyp, 36 jastaǵy azamatqa kúrdeli ota jasady. Eki eldiń dárigerleri birlesip jasaǵan operatsııada naýqastyń baýyrynyń jaramsyz bóligi qaýipsiz jolmen alyndy. Kúrdeli otanyń nátıjesinde álgi azamat aman qaldy. Endi baýyr aýrýy mazalamaýy tıis deıdi dárigerler.
Klınıkalyq aýrýhananyń bólim meńgerýshis Janbolat Dildábekovtyń aıtýynsha, buryn baýyrdyń qurtyn ashyp tazalaıtyn bolsa, qazir baýyrdy ashpaı, saý jerine tıispeı jaramsyz jerin ǵana alyp tastaýǵa bolady eken.
Osy oraıda aıta ketý kerek, jyl basynan beri oblystyq klınıkalyq aýrýhanada baýyrǵa qatysty 13 ota jasalǵan. Eń bastysy, nátıjesi qanaǵattanarlyq. Endi kúngeılik dárigerler Ońtústik Koreıa mamandarynan transplantatsııalyq ota jasaý ádisin meńgerýde. Ol úshin shetel asyp, arnaıy oqyp kelgen mamandar da bar. Sol dárigerler oblystyq klınıkalyq aýrýhanada bıyl alǵash ret búırek almastyrý otasyn oıdaǵydaı iske asyrǵan.
Osy is-sapar aıasynda koreıalyq dárigerler medıtsınalyq mekemeniń barlyq múmkindikterimen tanysyp shyqty. Sheteldik mamandar aıtqandaı, endi oblystyq klınıkalyq aýrýhanasynda transplantatsııalyq ota jasaýdyń tehnologııasy kúsheıtiledi.
