OQO sharýalarynyń ónimi reseılik iri saýda keshenine jóneltiledi
ShYMKENT. QazAqparat - Ońtústik Qazaqstan oblysy ákimdigi men Reseıdiń Novosıbırsk qalasyndaǵy «Fýdsıb» saýda kesheni arasynda yntymaqtastyq týraly memorandýmǵa qol qoıyldy, dep habarlaıdy oblys ákiminiń baspasóz qyzmeti.
Kelisimniń maqsaty - óńirdegi aýylsharýashylyq taýar óndirýshileriniń eksporttyq áleýetin arttyrýdy kózdeıdi. Mundaı kelisimge kórshi eldegi «Fýdsıb» jemister men kókónister kóterme jáne bólshek saýda kesheniniń ashylý rásimi barysynda qol jetkizilip otyr. Atalǵan jıynǵa oblys ákiminiń tapsyrmasymen OQO máslıhat hatshysy Q.Balabıev, «Yrys» mıkro qarjylyq uıymynyń dırektory Danııar Arynǵazın, Kólik jáne logıstıka aımaǵynyń bas dırektory E. Bektaev, «Ordabasy qus» JShS basshysy B. Jumahanov qatysyp qaıtty.
Eki el arasyndaǵy saýda-ekonomıkalyq qatynastardy damytý maqsatynda uıymdastyrylǵan sapar jemisti bolyp, «OŃTÚSTІK» aımaqtyq ınvestıtsııalyq ortalyǵy «RIC ON EXPORT» baǵdarlamasyn iske qosty. Nátıjesinde qazirgi tańda Ońtústikte óndirilgen taýarlardyń Novosıbırsk qalasyna birinshi jetkizilimin jóneltý josparlanyp otyr. Osy oraıda kompanııada Reseı Federatsııasyna ónimderdi eksporttaýdy uıymdastyrýda aýyl sharýashylyǵy taýaryn óndirýshilerge qoldaý kórsetý jáne keshendi qyzmet kórsetý úshin arnaıy jumys toby quryldy.
Aıta ketý kerek, «OŃTÚSTІK» AIO «RIC ON EXPORT» aýylsharýashylyq óndirýshileriniń eksporttyq áleýetin damytý baǵdarlamasynyń sheńberinde ortalyqpen qarjylandyrylǵan aýyl sharýashylyq taýar óndirýshileriniń qatysýymen «RIC ON KORME» atty turaqty kórme-jármeńke uıymdastyrylýda.
