OQO sharýalary jarty jylda 139,1 mlrd teńgeniń ónimin óndirgen

ShYMKENT. QazAqparat - Ońtústik Qazaqstanyń sharýalary bıyl 6 aıda 139,1 mlrd teńgeniń aýyl sharýashylyq ónimin óndirgen. Al, óńirdiń eksport qurylymynda Nıderlandy, Ózbekstan, Reseı, Qytaı jáne Aýǵanstan memleketteriniń úlesi mol. Bul týraly oblystyq ekonomıka jáne bıýdjetti josparlaý basqarmasynyń basshysy Arman Sábıtov málim etti, dep habarlaıdy QazAqparat HAA tilshisi.

Basqarma basshysynyń sózinshe, jyl basynan bergi jarty jylda ónerkásip óniminiń kólemi 371,5 mlrd teńgeni quraǵan. Óńdelgen ónim 250,4 mlrd teńgege satylǵan. Osylaısha oblys ekonomıkasynyń damýyna serpin beretin jalpy óńirlik ónim kólemi 1,1 trln teńgeje jetip otyr. Bul rette negizgi úlesti ónerkásip, aýyl sharýashylyǵy men qurylys salasy qosqan. Arman Sábıtovtyń aıtýynsha óńirdegi ónerkásip salasy óńdeý, taý-ken, bý, elektrmen jabdyqtaý, gaz, bý berý jáne aýa baptaý ónerkásibinen quralady. Tamaq ónimderin óndirý, farmatsevtıkalyq, metallýrgııa, mashına jasaý, jeńil ónerkásip salalary boıynsha da ósim baıqalady.

«Oblysymyzdaǵy ındýstrııalandyrý kartasynyń ekinshi bes jyldyǵy josparyna saı 135 jobany júzege asyrý josparda bar. Onyń ishinde bıyl 17 jobany iske asyrý kózdelýde. Atalǵan 17 jobanyń jalpy quny - 37 mlrd teńge.  Eger jobalar tolyq iske assa, 909 jańa jumys orny ashylatyn bolady», - dedi Arman Sábıtov.

Al, bólshek saýda aınalymy 182,3 mlrd teńgeni qurap, 18 mlrd teńgege artqan. Al, syrtqy saýda aınalymy 1,1 mlrd dollarǵa jetse, onyń ishinde eksport - 468,3 mln dollar, ımport - 620,6 mln dollar. Eksportqa negizinen et, tamaq ónimderi, dári-dármek, metall, mashına, qural-jabdyq, toqyma buıymdary shyǵarylýda.