OQO sharýalary Astanadaǵy jármeńkege 354 tonna azyq-túlik ónimderin ákeldi (FOTO)
ASTANA. QazAqparat - Astanada óńirlerdiń taýar óndirýshileriniń qatysýymen ótetin dástúrli aýyl sharýashylyq jármeńkelerin Ońtústik Qazaqstan oblysy bastady. Búgin Astana ákimi Áset Isekeshev pen Ońtústik Qazaqstan oblysynyń ákimi Beıbit Atamqulov jańa Oqýshylar saraıynyń aldynda ashylǵan sharaǵa at basyn tiredi, dep habarlaıdy elorda ákimdiginiń baspasóz qyzmetinen.
Jármeńkede 50-den astam aýyl sharýashylyq taýar óndirýshiniń ónimi usynylady. Ońtústik óńirden elordaǵa 354 tonna ónim ákelindi, sonyń ishinde, 69 tonna et ónimi, 141 tonna kókónis, 33 tonna jemis, 17 tonna kartop, 7 tonna sút ónimi, 5 tonna shubat, 7 tonna balyq, 25 myń jumyrtqa jáne t.b.
Sonymen qatar, áleýmettik mańyzdy ónimderdiń tolyq assortımenti usynylady. Barlyq ónim bazardaǵy baǵadan 15-20% arzan satylady. Jármeńke 2 jáne 3 shildede Oqýshylar saraıynyń turaq aýmaǵynda (B. Momyshuly dańǵ., 5) ótedi.
Aıta keteıik, keshe qala basshysy Á. Isekeshev áleýmettik mańyzdy taýarlarǵa baǵa qalyptastyrý máselesi boıynsha keńes ótkizip, azyq-túlik baǵasynyń negizsiz ósýine jol bermeýdi tapsyrdy. Osy baǵyttaǵy pármendi sharalardyń biri Qazaqstannyń aýyl sharýashylyq jármeńkeleri bolyp tabylady.
