OQO: Shardaralyq sportshylar marapattaldy
ShYMKENT. QazAqparat - Qazaqstan Respýblıkasynyń 25 jyldyǵyna oraı jasóspirimder arasynda ótken «Ońtústik Qazaqstan oblysynyń kýbogy» jarysynda shardaralyq sportshylar da baq synap keldi, dep habarlaıdy aýdan ákimdiginiń baspasóz qyzmeti.
Sporttyń 8 túri boıynsha ótken dúbirli dodada Shardara aýdanynyń komandasy qazaq kúresinen І oryndy, qyzdar arasynda ótken voleıbol jarysynan І oryndy ıelendi. Al uldar arasynda ótken voleıbol jarysynda ІІ oryndy, grek-rım kúresinen ІІІ oryndy baǵyndyrdy. Oblys boıynsha jalpykomandalyq esepte ІІ orynǵa kóterilgen jerlesterimiz aýylǵa osylaısha abyroımen oraldy. Shardaranyń dańqyn asqaqtatyp kelgen sportshylarǵa aýdan basshylyǵy da laıyqty qurmet kórsetti.
Aýdan ákimdiginiń úlken májilis zalynda aýdan ákiminiń orynbasary Baqtybaı Álipov jeńimpaz atanǵan voleıbolshy qyzdar men uldardy, boz kilemde atoı salǵan palýandardy «Alǵys hattarmen» jáne baǵaly syılyqtarmen marapattady. Sportshylarmen qatar olardyń osyndaı bıik náıjege qol jetkizýine ólsheýsiz eńbek sińirip júrgen jattyqtyrýshylaryna da syı-sııapattar berildi. Sondaı-aq, osynaý jıynda sport jetistikterin buqaralyq aqparat quraldarynda úzdiksiz jarııalap júrgen bir top jýrnalısterge aýdandyq dene shynyqtyrý jáne sport bólimi taǵaıyndaǵan baǵaly syılyqtar men «Alǵys hattar» da saltanatty túrde tabys etildi.
