OQO: Shardarada zorlyq-zombylyqtyń aldyn alýǵa arnalǵan aktsııa ótti
ShYMKENT. QazAqparat - «Zorlyq-zombylyqqa qarsy 16 kún» dep atalatyn halyqaralyq aktsııa aýdanda bekitilgen jumys josparyna sáıkes ótkizildi, dep habarlaıdy aýdan ákimdiginiń baspasóz qyzmeti.
Aktsııanyń sońǵy kúni aýdan ákimdigi janyndaǵy áıelder isteri jáne otbasylyq-demografııalyq saıasat jónindegi komıssııanyń uıymdastyrýymen aýdandyq balalar saz mektebinde ótti. Komıssııa tóraǵasy, aýdan ákiminiń orynbasary Baqtybaı Álipovtiń tóraǵalyǵymen ótken jıynǵa quzyrly organ qyzmetkerlerimen qatar mekteptegi tárbıe isi jónindegi orynbasarlary, pedagog-psıhologtar, ata-analar men birqatar otbasy músheleri qatysty.
Jıyn bastalǵan soń kelgen qonaqtarǵa «Jetim qyzdyń taǵdyry» atty jáne jat aǵymnyń jetegine erip, birneshe azamatqa turmysqa shyǵyp, basy shyrǵalańǵa túsken jas ananyń taǵdyry týraly qysqasha fılmder kórsetildi. Aýdandyq ishki ister bóliminiń áıelderdi zorlyq-zombylyqtan qorǵaý tobynyń ınspektory Dúısenbek Musabekov «Zorlyq-zombylyqqa qarsy 16 kún» halyqaralyq aktsııasyn iske asyrý maqsatyndaǵy atqarylǵan jumystar jóninde málimet berdi. Al, aýdandyq jumyspen qamtý jáne áleýmettik baǵdarlamalar bóliminiń bas mamany Elmıra Myltyqbaeva aýdandaǵy neke qııý jáne ajyrasýdyń aldyn alý boıynsha atqarylyp jatqan jumystardy aıtyp ótti.
«Aýdandyq jumyspen qamtý jáne áleýmettik baǵdarlamalar bóliminiń AHAT salasy boıynsha 2016 jyldyń 11-aıynda neke qııý týraly 512 aktilik jazba tirkelgen, onyń ishinde shetel azamatymen 14 neke tirkelgen, 2015 jyly 566 neke qııý tirkelgen. Al, 2016 jyldyń 11-aıynda neke buzý týraly 96 aktilik jazba tirkelgen, onyń ishinde sot sheshimimen 70 neke buzý tirkelse, jubaılardyń ortaq kelisimi negizinde 26 neke buzý tirkelgen. 2015 jyl kóleminde 81 neke buzý týraly aktilik jazba tirkelgen, onyń ishinde sot sheshimi negizinde 68 neke buzý týraly aktilik jazba tirkelse, erli-zaıyptylardyń ózara kelisimi negizinde 13 neke buzý tirkelgen. 2016 jyly 2015 jylǵa qaraǵanda neke buzýlardyń sany azdy-kópti artqandyǵy kórinedi», - dedi E.Myltyqbaeva. Jıyn barysynda «Qosseıit» jalpy orta mektebiniń dırektory Orynsha Qalshabekova, Shardara mektep-lıtseıiniń pedagog-psıhology Ferýza Jumabekova sóz sóılep, oı-pikirlerimen bólisti.
