OQO: Shardara aýdanynyń ákimi aýyldardy aralap, turǵyndarmen kezdesti

ShYMKENT. QazAqparat - Ońtústik Qazaqstan obldysy Shardara aýdanynyń ákimi Arman Abdýllaev pen bir top sala mamandary Aq altyn jáne Egizqum aýyldarynda bolyp, turǵyndarmen kezdesý ótkizdi, dep habarlaıdy OQO ákimdiginiń baspasóz qyzmeti.

Aq altyn aýylynyń turǵyndary negizinen aýyz sý máselesin kóterip, ákimdiktiń bir áreket etýin surap júrgen edi. Kommýnaldyq sala mamandarynyń aıtýynsha aýylda sý joq emes, bar. Biraq, aýyl turǵyndary túgeldeı qubyr jelisin aýlalaryna tartpaǵan. Aýyl ortalyǵynda taza sý beretin «Omega» qondyrǵysy bar, biraq oǵan da kúrdeli jóndeý qajet. Eki jaqty muqııat tyńdaǵan aýdan ákimi turǵyndarǵa túgeldeı qubyr jelisine jalǵaný kerek ekendigin túsindirdi. Sodan soń, aýyz sý torabynyń qyzmetkerlerine 1 qarashaǵa deıin úzdiksiz sý aǵyzyp qoıý jóninde tapsyrma berdi. Al, aýyl adamdary osy aralyqta kóshege kelip turǵan qubyr jelisinen úılerine sý tartyp alatyn boldy.

Sondaı-aq, aýdan ákimi «Omega» qondyrǵysyn iske qosý jóninde de jaqsy habar jetkizdi. Bıyl aýdan boıynsha 4 «Omegany» kúrdeli jóndeýden ótkizýge 3,9 mln teńge qarjy qarastyrylyp otyr. Jaqyn kúnderde ótetin bıýdjetti naqtylaý kezinde osy qarjyny bólý qarastyrylmaq. Kúrdeli jóndeýden ótetin qondyrǵynyń bireýi osy aýyldaǵy «Omega» qondyrǵysy ekenin estigen turǵyndardyń kóńilderi jaılandy.

Budan keıin aýdan basshysy Arman Abdýllaev «Jol kartasy  2020» baǵdarlamasy aıasynda salynyp jatqan jaıaý júrginshiler jolynyń qurylysymen tanysty. Aýyldaǵy ortalyq kóshege salynyp jatqan 270 metrlik aıaqjol osy qazan aıynda aıaqtalmaq. Aýdan ákimi tıisti mamandarǵa jumysty sapaly jasap ári ýaqtyly bitirýdi tapsyrdy.