OQO: Saıramda ótken jyly 103 shaǵyn mal bordaqylaý alańy ashyldy
ShYMKENT. QazAqparat - Ońtústik Qazaqstan oblysy Saıram aýdanynda bir jylda aýdannyń aýylsharýashylyǵy salasynda 58,8 mlrd teńgeniń ónimi óndirildi. Ósim 103,6 paıyzdy qurap, oblys boıynsha úshinshi orynǵa turaqtaǵan, dep habarlaıdy QazAqparat tilshisi.
Aýylsharýashylyǵy salasy damyǵan aýdanda 26,7 myń tonna et, 119,3 myń tonna sút, 15,9 mln dana jumyrtqa óndirildi. Jylyjaı sharýashylyǵynda da alǵa jyljý bar. Aýdanda 8 ga jerge jylyjaılar salynyp, jalpy kólemi 27,35 gektarǵa ulǵaıtyldy. 103 birlik 10-15 bastyq shaǵyn mal bordaqylaý oryndary, 41 januıalyq sút aýlalary ashyldy. 2017 jyldyń 26 qazany kúni oblysta aýyl sharýashylyǵy eńbekkerleriniń «AGROFEST-2017» merekesi ótkizilip, jyl qortyndysymen aýdan eńbekkerleri oblysta sút óndirýden kósh bastap, kókónis óndirýden ekinshi oryn jáne et, maqsary óndirý men tamshylatyp sýǵarý ádisin endirýden úshinshi orynǵa turaqtady.
Elbasynyń «100 naqty qadam - Ult josparyndaǵy» et jáne sút ónimderin óndirý, olardy jańa tehnologııalar negizinde qaıta óńdeý kólemin arttyrý aıtylǵan. Bul rette aýdanda 2021 jylǵa qaraı qaıta óńdeý kásiporyndary óndirilgen ónimderdiń óńdeý úlesin arttyrý kózdelip otyr. Máselen, et óńdeýdi 21 paıyzǵa, sút óńdeýdi 23 paıyzǵa, kókónis-jemis óńdeýdi 46 paıyzǵa jetkizý josparlanǵan.
