OQO polıtseıleri tabıǵatty qorǵaý tártibin buzǵandarǵa 250 myń teńge aıyppul saldy
ShYMKENT. QazAqparat - Ońtústik Qazaqstan oblysynyń ІІD Kóshi-qon qyzmeti tabıǵatty qorǵaý polıtsııasynyń qyzmetkerleri «Tabıǵatty qorǵaý» aldyn alý is-sharasyn ótkizdi. Ekologııalyq qylmys pen quqyqbuzýshylyqtardy anyqtaýǵa jáne onyń jolyn kesýge baǵyttalǵan sharada jer qoınaýyn óz betinshe paıdalanýshylardyń áreketi áshkere boldy, dep habarlaıdy QazAqparat tilshisi.
Jedel aldyn alý is-sharasy ótken bes táýlikte 4 ekologııalyq qylmys ashyldy. Aǵashtar men butalardy zańsyz kesýdiń 3 oqıǵasy, jer qoınaýyn óz betinshe paıdalaný deregi boıynsha bir derek anyqtalǵan. Máselen, Saryaǵash aýdanynda reıdtik is-sharalar júrgizý barysynda polıtseıler Keles ózeninde zańsyz jer qoınaýyn paıdalanǵan 1983 j.t. jergilikti turǵyndy ustady. Aıǵaqty zat retinde olardan ekskavator jáne júk kólikteri tárkilenip alyndy. Osy oqıǵa boıynsha Qylmystyq kodekstiń 334-baby «Jer qoınaýyn óz betinshe paıdalaný» boıynsha is qozǵalyp, sotqa deıingi tergeý amaldary júrgizilýde. Sondaı-aq atqarylǵan is-sharalar nátıjesinde tabıǵatty qorǵaý zańy boıynsha 86 ákimshilik quqyqbuzýshylyqtar anyqtalǵan. Atap aıtqanda, azamattar balyq aýlaý erjelerin buzýdyń 15 faktisi, jasyl ekpelerdi kútip ustaý men qorǵaý qaǵıdalaryn buzdyń 16 faktisi anyqtaldy. Al, ań aýlaý jáne janýarlar dúnıesin paıdalaný erejesin buzdyń 33 deregi anyqtaldy, 20 derek basqa da quqyqbuzýshylyqtarmen baılanysty boldy. Barlyq anyqtalǵan ákimshilik quqyqbuzýshylyqtar boıynsha ákimshilik hattamalar toltyrylyp, 250 myń teńge aıyppul salyndy.
