OQO pedagogtary Nazarbaev Zııatkerlik mektepteriniń tájirıbesin úırenedi
ASTANA. QazAqparat - Ońtústik Qazaqstan oblysynyń ákimi Janseıit Túımebaev «Nazarbaev Zııatkerlik mektepteri» derbes bilim berý uıymy men aımaqtaǵy bilim salasynyń basshylarymen kezdesti. Basqosý maqsaty - atalǵan oqý ornynyń ozyq pedagogıkalyq tájirıbelerin ózge mektepterge taratý, aımaqtaǵy ınnovatsııalyq bilim berýdiń sapasyn arttyrý. Kezdesý barysynda óńir basshysy búgingi tańda elimizde bilim berý júıesi jańa baǵytqa bet burǵandyǵyn atap ótti.
«Elbasymyz «Bilim-ǵylym-ınnovatsııa» atty úshtik ústemdikke baǵyt alýymyz kerek» dep atap ótken bolatyn. Endeshe, bilim berý júıesiniń jańa sapalyq deńgeıge ótý qajettiligi arta túsýde. Ońtústigimizdegi ınnovatsııalyq bilim berýdiń sapasyn arttyrýda ortaq múddelerge birlesip qol jetkizýdi kózdep otyrmyz. Negizgi maqsat - jan-jaqty bilimdi, qabiletti jeke tulǵany, elimizdiń erteńgi tutqasyn berik ustaýǵa daıyn, tolyqqandy jetilgen memleketshil, patrıot jańa býyn qalyptastyrý»,- dedi Janseıit Qanseıituly.
Aıta keterligi, Ońtústik Qazaqstan oblysynda pedagog kadrlardy qaıta daıarlaýda bıyl 17 myń ustaz biliktiligin arttyrǵan. Sondaı-aq, oblystaǵy 15 aýdan boıynsha quramyna 352 muǵalim engen mobıldi toptar qurylyp, jumys atqarylýda. Al 2018 jyly 2500-den astam muǵalimdi aǵylshyn tili kýrsynan ótkizý josparlanyp otyr.
Óz kezeginde sóz alǵan «Nazarbaev Zııatkerlik mektepteri» derbes bilim berý uıymynyń basqarma tóraıymy Kúlásh Shamshıdınova «Jańartylǵan bilim berý ne úshin kerek?» taqyrybynda baıandama jasap, jańa oqytý ádistemelerin ózge de mektepterge engizýdiń mańyzdylyǵyn jetkizdi.
Basqosý sońynda oblys ákimdigi men «Nazarbaev Zııatkerlik mektepteri» derbes bilim berý uıymy arasynda 2017-2019 jyldarǵa arnalǵan ózara yntymaqtastyq ornatý jóninde memorandýmǵa qol qoıyldy. Bolashaqta memorandým nezinde aımaqtaǵy mektep muǵalimderi «Nazarbaev Zııatkerlik mektepteriniń» ozyq pedagogıkalyq tájirıbelerin meńgeretin bolady.
