OQO: Paramen ustalǵan Іshki saıasat basqarmasynyń eks-basshysy bosatyldy

  ShYMKENT. QazAqparat  - Ońtústik Qazaqstan oblysynda para aldy dep aıyptalǵan Іshki saıasat basqarmasynyń burynǵy basshysy Bolatbek Tólegen sot zalynan bosatyldy, dep habarlaıdy QazAqparat tilshisi.

Qylmystyq isti qaraǵan Abaı aýdandyq sotynyń tóraǵasy Saıdybattal Toqbergenov aıyptalýshyny Qylmystyq kodekstiń 366-baby 3-bóligi 1-tarmaǵy («Para alý») boıynsha kináli dep taýyp, oǵan 40 547 840 teńge kóleminde aıyppul tóleýge úkim etti. Ol aıyppuldy bir aı kóleminde tóleýge mindetteldi. Sondaı-aq burynǵy sheneýnik memlekettik qyzmetten ómir boıyna shettetildi.

Sýdıanyń atap ótkenindeı, basqarma basshysy buǵan deıin 2 mln 100 myń teńge kóleminde para aldy dep aıyptalǵan bolatyn. Biraq sonyń ishindegi 1,5 mln teńgeni alǵany dálelin tappady. Sondyqtan bastapqyda belgilengen 42 mln teńge kólemindegi aıyppul somasynan 1,5 mln teńge shegerildi.

«Eger aıyppul bir aıdyń ishinde tólenbese úkim qaıta qaralyp, jaza qatańdatylady», - dedi sot tóraǵasy.  

Osylaısha, OQO ákimdiginiń burynǵy qyzmetkeri Bolatbek Tólegen sot zalynan bosatyldy.

Esterińizge sala keteıik, ótken jyldyń 7 qazanynda júrgizýshi arqyly para alyp jatqan oblystyq Іshki saıasat basqarmasynyń basshysy Bolatbek Tólegen ustalǵan bolatyn. Olardan para retinde 600 myń teńge tabylǵan bolatyn. Keıinnen basqarma basshysy 2 mln 100 myń teńge para almaq bolǵan dep aıyptalǵan edi.  Bolatbek Tólegen eki aıǵa tergeý abaqtysyna qamaldy.