OQO: Para aldy dep aıyptalǵan MKD bastyǵynyń orynbasary 2 aıǵa qamaldy
Sýdıanyń sózinshe, laýazymdy tulǵa Qylmystyq Kodekstiń 366-babynyń 4-bóligimen kúdikti dep tanylǵan.
«Nurjan Teńlibaevqa qylmystyq qýdalaý organdary «Laýazymdy tulǵa bola tura adamdar tobymen sóz baılasyp, asa iri kólemde para alǵan» degen aıyp taǵyp otyr. Qazir bizde qaralǵan materıal boıynsha ol 144 myń AQSh dollaryn jáne 4 mln 500 myń teńgeni para retinde alǵan dep aıyptalyp otyr», - dedi sýdıa.
Ǵanı Baıarystannyń deregine súıensek, aıyptalýshy bul laýazymdy qyzmetti 2014 jyldan beri atqaryp kelgen.
«Ol kisi - departamenttiń keden salasyn baqylaıtyn orynbasar. Oblystaǵy keden beketteriniń jumysyn qadaǵalaý, tártibin baqylaý óziniń fýnktsıonaldyq mindetterine kirgen. 2014 jyldan beri osy atalǵan qyzmette jumys istep keledi. Áıeli, tórt balasy bar. Bilimi joǵary. Jalpy 1991 jyldan beri keden salasynda qyzmette. Qazirgi qyzmetin 2014 jyldan beri atqaryp keledi. Ol sondaı-aq buǵan deıin aımaqta jappaı ustalǵan keden salasyndaǵy 15 adamnyń isine qatysy bar dep kúdiktelip otyr. «Qazyǵurt», «Qaplanbek», «Atameken» jáne «Saryaǵash» keden beketteri qyzmetkerleriniń isimen baılanysty», - dedi sýdıa.
Esterińizge salaıyq, 2 maýsym kúni Sybaılas jemqorlyqqa qarsy kúres boıynsha Ulttyq bıýro Ońtústik Qazaqstan oblysy boıynsha Memlekettik kirister departamenti basshysynyń orynbasary Nurjan Teńlibaevty ustaǵan bolatyn. Laýazymdy tulǵaǵa "Qylmystyq jospardy uıymdastyryp, oǵan ózine baǵynyshty tórt kedendik bekettiń basshylaryn tartqan, syrtqy ekonomıkalyq qyzmettegi jalpy qamqorlyǵy úshin kásipkerlerden júıeli túrde para alýdy uıymdastyrǵan» degen aıyp taǵylǵan edi.
Ulttyq bıýronyń málimeti boıynsha, Nurjan Teńlibaev 2017-2018 jyldar aralyǵynda alǵan zańsyz syıaqynyń kólemi 1,2 mln AQSh dollaryna jetken. Qazirgi kezde sotqa deıingi tergeý amaldary júrip jatyr.