OQO: Otyrar aýdanyndaǵy 22 aýylǵa gaz tartylady
ShYMKENT. QazAqparat - Ońtústik Qazaqstan oblysynyń ákiminiń tapsyrmasyna sáıkes Otyrar aýdanynda 12 páterlik 2 qyzmettik úıdiń qurylysy júrgizilýde. Sháýildir aýylynda boı kóteretin turǵyn úılerdiń jalpy quny 311,6 mln teńge bolyp bekitilgen. Bul týraly atalǵan aýdanǵa uıymdastyrylǵan press-týr kezinde belgili boldy, dep habarlaıdy QazAqparat tilshisi.
Aýdan ákimi Erlan Aıtahanovtyń aıtýynsha, turǵyn úılerdiń qurylys jumystary jospar boıynsha 2019 jylǵa aıaqtalady. Bıyl atqarylatyn qurylys jumystaryna oblystyq bıýdjetten 200 mln teńge qarjy qaralǵan.
Aýdan basshysy jańadan boı kóterip jatqan sport kesheniniń qurylys jumystarymen tanystyrdy. Zamanaýı úlgide salynyp jatqan keshende dzıýdo, sambo, qazaq kúresiniń kilemderi men voleıbol, fýtbol, basketbol alańdary salynatyn bolady. Aǵymdaǵy jyly paıdalanýǵa beriletin jobanyń quny 293 mln teńgeni quraıdy.
Erlan Aıtahanovtyń sózinshe, tarıhta alǵash ret aýdan turǵyndary kógildir otynǵa qol jetkizetin bolady. Sóıtip aýdan ortalyǵy Sháýildir aýyly men onyń janyndaǵy Temir eldi mekeni bıyl kómir jaǵýdan qutylady. Bul jumystarǵa oblystyq bıýdjetten 1 mlrd 558 mln teńge qarjy qarastyrylǵan.
«Jalpy 2014-2016 jyldary 4 mlrd 181 mln teńgege aýdandy tabıǵı gazben qamtý jumystary júrgiziledi dep josparlanǵan. Búginde 51,4 shaqyrym magıstraldyq gaz qubyryn júrgizý jáne AGTS qurylysyn salý jumystary aıaqtalǵan. Aýdan kólemindegi bir-birine jáne Sháýildirge jaqyn ornalasqan 22 eldi mekenge gaz júıesin júrgizý úshin jobalyq smetalyq qujattaryn daıyndaýǵa bıýdjetten qarjy bólingen. Eger joba tolyǵymen iske assa, aýdan halqynyń 71 paıyzy kógildir otynmen qamtylatyn bolady», - dedi Erlan Qýanyshuly.
