OQO: Órtten qaza tapty degen kelinshektiń pyshaqtalǵany anyqtaldy
ShYMKENT. QazAqparat - Ońtústik Qazaqstan oblysynda órtten qaza bolǵan kelinshekti qaıynjurty jerlemek bolǵan. Alaıda tártip saqshylary máıitti tekserý barysynda onyń birneshe jerinen pyshaqtalǵanyn anyqtady, dep habarlaıdy QazAqparat tilshisi.
Qylmystyq oqıǵa Saryaǵash aýdanynda bolǵan. Polıtsııanyń kezekshi bólimine Abaı aýylynyń jedel járdem ekıpajynan 30 jastaǵy áıeldi elektr togy soǵyp, nátıjesinde qaıtys bolǵany jaıly habarlama túsken.
Oqıǵa ornyna jetken jedel-tergeý tobyna týystary marqumnyń óz úıinde órtenip ólgenin aıtqan. Órtti áıeldiń 7 jasar balasy kórip, kórshilerin kómekke shaqyrǵan. Jalyn sóndirilgennen keıin áıeldiń múrdesi syrtqa shyǵarylǵan. Marqumnyń denesi dástúrge saı aq mataǵa oralyp qoıǵandyqtan, ony polıtsııa qyzmetkerlerine kórsetýden bas tartylǵan. Biraq polıtsııa qyzmetkerleri týys-týǵandarmen túsindirý jumystaryn júrgizip, nátıjesinde qaza bolǵan áıelge sot-medıtsınalyq saraptama jasaldy.
Onyń qorytyndysyna sáıkes, 1987 jyly týǵan kelinshektiń denesiniń kókirek jáne qaryn tusynda kesip-tesilgen jaraqattar bar ekeni, ol sonyń saldarynan qaıtys bolǵany anyqtaldy. Ony jasaǵan kúdikti qylmysyn jasyrý maqsatynda máıitti órtep ketkeni belgili boldy.
Áıeldi óltirdi degen kúdikke alǵashynda kúıeýi iligip, ustalǵan bolatyn. Alaıda tergeýshilerdiń tyńǵylyqty jumystarynyń nátıjesinde naǵyz qylmysker artynsha qolǵa tústi. Ol 1990 jyly týǵan Saryaǵash aýdanynyń turǵyny bolyp shyqty. Tergeý barysynda onyń marqum áıelge sezimi bolǵany, alaıda ol kúıeýiniń bar ekenin aıtyp, kóńildes bolýdan bas tartqany anyqtaldy. Osyǵan ashýlanǵan sezikti ony óltirip, órtep jibergen. Qazirgi tańda onyń ústinen Qylmystyq kodekstiń 99-baby («Adam óltirý») boıynsha is qozǵalyp, qylmys tolyǵymen dálelin tapty.
Іs sotqa joldanyp, kúdikti ýaqytsha tergeý abaqtysyna qamaldy.
