OQO «Órleý» jobasyn júzege asyrýda kósh bastady

«2018 jyldyń 1 qańtarynan bastap qazirgi usynylatyn úsh túrli áleýmettik tólemderdiń ornyna ataýly áleýmettik kómektiń jańa sıpaty engiziletin bolady. Ol úshin halyqty «Órleý» jobasyna jappaı jumyldyryp, jumyspen qamtýdy qolǵa alǵan jón», - Ońtústik Qazaqstan oblysyna jasaǵan sapary barysynda elimizdiń Eńbek jáne halyqty áleýmettik qorǵaý mınıstri Tamara Dúısenova osylaı málim etti.

Mınıstrlik qolǵa alǵan «Órleý» jobasynyń maqsaty -  ómirinde qıyn jaǵdaıǵa tap bolǵan jáne belgili bir sebepterge baılanysty tyǵyryqtan shyǵa almaı jatqan azamattarǵa kómek qolyn sozý. Tyń tásildi synaqtan ótkizý aıasynda 2015 jyly kedeılik sheginen asqanǵa deıin turaqty túrde memleket járdemin ıelenýge múmkindik beretin «Órleý» jobasy dúnıege kelgen bolatyn. Bul rette memleket tarapy jumyspen qamtý ortalyqtary arqyly jeke is ashýǵa, oqý men jumysqa ornalasýǵa qaraılasady. Ońtústik Qazaqstan oblysynda jarty jyl ishinde 75 myńǵa jýyq adam «Órleý» jobasy aıasynda memleket qoldaýyna ıe bolyp, respýblıkada kósh bastady.

Bıyl 1 shildedegi jaǵdaı boıynsha, Ońtústik Qazaqstan oblysynda shartty aqshalaı kómek 12 813 otbasyndaǵy 74 705 adamǵa taǵaıyndalyp, jalpy somasy 3,6 mlrd teńgeni quraǵan. Eńbekke qabiletti 13 846 adam jumyspen qamtýǵa járdemdesý sharalarymen qamtylyp, onyń ishinde 11 528 adam nemese 89,7% turaqty jumysqa ornalasqan.

Mınıstr oblys ákimdiginde ótken qorytyndy jıyn barysynda halyqty jumyspen qamtý jáne áleýmettik kómek kórsetý maqsatynda aýdan ákimderiniń jáne ózge de jergilikti quzyrly mekemelerdiń ýaqytsha naýqandarǵa urynbaı, jumysty uzaq merzimge jemis beretindeı sapaly júrgizýiniń mańyzdylyǵyn atap ótip, jalpy oblysta tyndyrylǵan is-qımyldardy oń baǵalady.

 «Ońtústik Qazaqstan oblysynda jumyssyz jáne ózin ónimsiz jumyspen qamtyǵan azamattardy jańa jumyspen qamtý baǵdarlamasyna belsendi tartý qajet. Az qamtylǵan otbasylardy kóptep «Órleý» jobasyna jumyldyra alsaq, kelesi jyldan ataýly áleýmettik kómektiń jańa sıpatyn iske qosýǵa da daıyndyq deńgeıi sonshalyq joǵary bolmaq», - dedi Tamara Dúısenova.

Aǵymdaǵy jyly az qamtamasyz etilgen azamattarǵa esh nársege kúsh salmaı-aq, áleýmettik kómektiń eń tómengi mólsherin alý, ne bolmasa jobaǵa qatysyp, turaqty jumysqa ornalasý múmkindigi týyp otyr.  Sonymen qatar, jeke isin (mal, qus jáne ósimdik sharýashylyǵymen shuǵyldaný) ashý úshin 3 aıdyń shartty aqshalaı kómektiń somasyn birden alý tańdaýy berilýde.   

Ońtústik Qazaqstan oblysynda jeke qosalqy sharýashylyqty jáne kásipkerlik qyzmetti damytýǵa birjolǵy qarajat somasyn tóleý arqyly járdemdesý tıimdiligin baıqatyp úlgerdi.  Búgingi tańda «Órleý» jobasyna qatysýshylardyń qatarynda 400 birjolǵy shartty aqshalaı kómek alýshy jeke kásipker retinde salyq organdaryna tirkelip úlgergen. «Órleý» jobasyn júzege asyrý nátıjesinde shartty aqshalaı kómek alýshylardyń kirisi 3,2 esege ósip, ortasha alǵanda adam basyna aıyna 18,1 myń teńge mejeledi.          

Jalpy, Ońtústik Qazaqstanda Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy sheńberinde 2017 jyly 64314 adamdy qamtý josparlanyp, jalpy 11,4 mlrd teńge bólindi. 2017 jyldyń 1 tamyzyna 49,6 myń adam qamtylyp, jyldyq jospardyń 77% oryndalǵan.

Budan bólek, jyl saıyn áleýmettik qoldaý sharalary aıasynda 7,8 myń zeınetker men múgedekke ardagerler úıinde ońaltý jáne saýyqtyrý kómegi jasalǵan.  Onyń ústine jyl aıaǵyna deıin múmkindigi shekteýli 67 myńǵa jýyq adam áleýmettik ońaltý qyzmetterimen jáne tehnıkalyq kómekshi quraldarmen qamtamasyz etiletini josparlanyp otyr.