OQO: Ordabasy aýdanynda «Nurly jer» baǵdarlamasymen 500-deı páter beriledi

ASTANA. QazAqparat - Ońtústik Qazaqstan oblysy Ordabasy aýdanynda ótken jyly eki páterli kommýnaldyq 14 turǵyn úı paıdalanýǵa tapsyrylǵan. Al bıyl «Nurly jer» baǵdarlamasymen 480 páterdi el ıgiligine berý kózdelýde. Bul týraly OQO óńirlik kommýnıkatsııalar qyzmetinde ótken brıfıngte Ordabasy aýdanynyń ákimi Rashıd Qaıypjanov málim etti.

Sondaı-aq, aýdanda aǵymdaǵy jyly 720 oryndyq 5 jekemenshik balabaqsha ashyp, balalardy mektepke deıingi oqytý men tárbıeleýdiń qamtylýyn 87,5 paıyzǵa jetkizý josparlanyp otyr.

Ákimniń aıtýynsha, Ordabasy aýdanynda «Indýstrııalyq-ınnovatsııalyq damý» memlekettik baǵdarlamasy aıasynda 2010-2015 jyldar aralyǵynda 11 joba iske qosylyp, 1027 azamat jumyspen qamtylǵan.

«Indýstrııalandyrý kartasy aıasynda ótken jyly «Bórte mılka» JShS-niń sút óńdeý zaýyty jumysyn bastady. Jalpy quny 4,4 mlrd. teńgeni quraıtyn óndiris orny 70-ke jýyq adamǵa jumys taýyp berip otyr. 2017 jyly óńdeý ónerkásibi salasynda 14 mlrd. 835 mln. teńgeniń ónimi óndirilse, aǵymdaǵy jyly kórsetkishti 18 mlrd. 128 mln. teńgege jetkizý kózdelýde», - dedi Rashıd Úsiphanuly.

Aıta keterligi, ındýstrııaldy-ınnovatsııalyq damý memlekettik baǵdarlamasy boıynsha aýdanda 2018 jyly jalpy quny 3 mlrd. 741 mln. teńgeni quraıtyn 4 ınvestıtsııalyq jobany iske asyrý josparlanýda. Atalǵan jobalar iske qosylǵanda 200-den asa adam jumyspen qamtylady.

Sonymen qatar, bıyl aýdandaǵy aýylsharýashylyǵy ónim kólemin 39 mlrd. teńgege ulǵaıtý josparlanyp otyr. Sondaı-aq, ótken jyly aýdanda 2 modýldi sút qabyldaý beketi ashylǵan.

Aýdan basshysynyń málimdeýinshe, óńirde ınfraqurylym salasy da óz sheshimin taýyp keledi.

«Qazirgi tańda aýdan kólemindegi 57 eldi mekenniń 40-y aýyz sýmen 24 saǵat boıy qamtylyp, kórsetkish 90,7 paıyzyn qurady. Ózge 17 eldi meken turǵyndary qudyq sýyn paıdalanady, ol jalpy halyqtyń 9,3 paıyzy. Halyqty kógildir otynmen qamtý boıynsha 2022 jyly aýdan halqynyń 100 paıyzy tolyǵymen tabıǵı gazben qamtylady dep josparlanýda», - dedi Rashıd Qaıypjanov.

Ordabasy aýdanynda «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» boıynsha 4002 qatysýshy azamatqa áleýmettik qoldaý kórsetilip, jospar 142,1 paıyzǵa oryndalǵan.