OQO-nyń úsh aýdanynda mal urlyǵymen aınalysqan qylmystyq toptyń músheleri sottaldy
ShYMKENT. QazAqparat - Ońtústik Qazaqstan oblysynda úsh aýdanynda mal urlyǵymen aınalysyp júrgen qylmystyq toptyń músheleri sottaldy. Tártip saqshylarynyń málimetinshe, barymtashylar 20 túrli mal urlyǵyna qatysy bar ekendigi dáleldengen, dep habarlaıdy QazAqparat tilshisi.
Barymtashylardy ustaýǵa Ordabasy aýdanynyń birneshe turǵyny polıtsııa bólimine aryzdanyp kelýi sebep bolypty. Azamattar aryzdarynda belgisiz bireýler jaıylym jerlerden jáne qoralardan maldaryn urlap ketkeni týraly kórsetken. Máselen, sáýir aıynda 58-jastaǵy jergilikti turǵynnyń jaıylymda júrgen eki sıyry qoldy bolǵan. Osy qylmysty ashý maqsatynda polıtsııa bóliminde tájirıbeli mamandary barymtashylardyń izine túsedi. Jedel shara barysynda 7 adamnan quralǵan uıymdasqan qylmystyq top ustaldy. Olardyń barlyǵy da Shymkent jáne Ordabasy aýdanynyń turǵyndary ekeni anyqtalǵan. 
Tergeý barysynda 22 jáne 27 jas aralyǵyndaǵy kúdiktilerdiń Ordabasy, Báıdibek jáne Qazyǵurt aýdandarynda turaqty túrde barymtashylyqpen aınalysyp, jábirlenýshilerge jalpy kólemi 6 mıllıon teńgeden asa shyǵyn keltirgeni dáleldendi. Al, qylmystyq topty 23 jastaǵy Shymkent qalasynyń turǵyny basqarǵan. Toptyń árbir múshesiniń óziniń qyzmeti bolǵan. Biri jábirlenýshiden mal urlap alsa, ekinshisi ony satyp kelgen. Úshinshi adam urlyqqa jón silteýshi bolǵan. Olar kóbinde turǵyndardyń úıinde bolmaǵanyn paıdalanyp qorasy men jaıylymnan iri qara maldaryn urlaǵan. Qoldy bolǵan maldardy satyp, aqshasyn ıemdenip ketip otyrǵan. Polıtseıler urlanǵan maldy satyp alyp otyrǵan adamdy da ustady. Atalǵan jaıttar boıynsha Qylmystyq kodekstiń 262-babynyń 1-2 bóligi «Uıymdasqan qylmystyq topty qurý jáne basqarý» jáne 188-baby «Urlyq» boıynsha is qozǵalyp, tergeý amaldary júrgizildi.
Búgingi tańda sottyń sheshimimen uıymdasqan qylmystyq toptyń jetekshisi 23 jastaǵy Daýrenbek Qoıshyman 7 jylǵa sottalsa, ózge músheleri 5,8 jylǵa bas bostandyqtarynan aıryldy.
