OQO-nyń turǵyny polıtseıge kúsh kórsetkeni úshin qamaýǵa alyndy
ShYMKENT. QazAqparat - Ońtústik Qazaqstan oblysynda turǵyndar men polıtseıler arasynda daý shyǵyp, tipti tóbeles bolǵan. Nátıjesinde tártip saqshysyna kúsh kórsetken azamat qamaýǵa alyndy, dep habarlaıdy QazAqparat HAA tilshisi.
Keleńsiz jaǵdaı Shymkent-Almaty tasjolynyń boıyndaǵy Mankent aýylynyń mańynda bolǵan. Jol patrýldik polıtsııa qyzmetkerleri «VAZ-21014» kóliginiń júrgizýshisi jol erejesin buzǵanyn baıqap qalyp, toqtatýǵa árekettengen. Alaıda júrgizýshi tártip saqshylarynyń aıtqanyna baǵynbaı, qasha jónelgen. Sóıtip jol boıynda «VAZ-2103» kóligimen soqtyǵysqan. Sonyń saldarynan 4 adam jaraqattanyp, aýrýhanaǵa jetkizilgen. Jol kólik oqıǵasy bolǵan jerde adamdar jınalyp qalady. Olar qarap otyrmaı polıtsııa qyzmetkerlerimen sózge kelip, sońy daýǵa ulasqan. Іshki ister qyzmetkerlerine qoqan-loqqy jasap, aralarynda bir adam qol jumsapty. Polıtseıdi jaraqattaǵany úshin 39 jastaǵy turǵyn qamaýǵa alyndy.
Onyń ústinen Qylmystyq kodekstiń 378-«Bılik ókilin qorlaý», 379-«Bılik ókiline baǵynbaý», 380-« Bılik ókiline qatysty kúsh qoldaný» baptarymen is qozǵalyp, tergeý amaldary júrgizilýde. Al, jol kólik oqıǵasyn jasap, jol saqshylarynan qashpaq bolǵan júrgizýshi de Qylmystyq kodekstiń 345 baby «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» áreketi boıynsha jaýapqa tartylatyn boldy.
