OQO-nyń turaqtandyrý qorynan 165 mln teńgeniń taýary joǵaldy
ShYMKENT. QazAqparat - Ońtústik Qazaqstan oblysynyń turaqtandyrý qorynan mıllıondaǵan teńgeniń taýarlary joǵalyp ketti. Qoımada tekserý júrgizgen prokýratýra qyzmetkerleri qorǵa jınalǵan azyq-túliktiń kemigenin anyqtaǵan.
Quzyrly organ ókilderi bas-aıaǵy 165 mln.-ǵa jýyq teńgeniń ónimi tabylmaı otyrǵanyn málimdedi. Qazir bul ispen óńirdiń sybaılas jemqorlyqqa qarsy is-qımyl qyzmeti aınalysyp jatyr, dep habarlaıdy QazAqparat HAA tilshisi.
«Mundaı faktilerdi tekserý jasaǵan organ ókilderi anyqtady. Ázirge qandaı da bir talan-taraj týraly naqty aıtý erterek. Sottyń úkimi joq, kiná dáleldenbegen. Sebebi, kelisimsharttar bar, taýar bostan-bos joǵalyp ketpegen»,-dedi «Shymkent» áleýmettik-kásipkerlik korporatsııasy basqarma tóraǵasynyń orynbasary Maratbek Myrzamuratov.
Oblystyq prokýratýra ókilderiniń tekserý qorytyndysyna sáıkes, «Ońtústik» azyq-túlik kompanııasy» jaýapkershiligi shekteýli seriktestiginiń jaýapty mamandary 2015 jyldyń qazan aıynan 2017 jyldyń qańtar aıyna deıin 164 810 085 teńgeniń taýaryn talan-tarajǵa ushyratqan. Al osy jyldyń 21 aqpan kúni eki kompanııanyń burynǵy basshylarynyń ústinen qylmysty is qozǵaldy.
Aıta keteıik, turaqtandyrý qoryndaǵy azyq-túliktiń jetispeýshiligi jaıyndaǵy aqparat «Shymkent» áleýmettik-kásipkerlik korporatsııasy basshylyǵy aýysqan soń aıtyla bastady. Turaqtandyrý qory osy korporatsııanyń quramyna kiredi. Osyǵan oraı ulttyq kompanııanyń jańa basshysy men oblystyq ákimdik taýarlardy tekserip, kemshilikti anyqtaǵan. Ázirge qoımadan naqty qansha ónim kemigeni belgisiz. Degenmen, materıaldar óńirdiń sybaılas jemqorlyqqa qarsy qyzmet departamenti ókilderine tapsyryldy.
Quzyrly organdardyń málimetinshe «Shymkent» áleýmettik-kásipkerlik korporatsııasy» Ulttyq kompanııasy» AQ men «Ońtústik» azyq-túlik kompanııasy» JShS-niń jetekshileri men jaýapty qyzmetkerlerine qatysty Qylmystyq kodekstiń 189-babynyń 4-tarmaǵy, 3-bóligimen is qozǵalyp, sotqa deıingi tergep-tekserý amaldary júrgizilýde. Shymkent qalalyq Ál-Farabı aýdandyq soty «Ońtústik» azyq-túlik kompanııasy» JShS bas dırektory O.Baqtybaevty qamaýǵa alý týraly sanktsııa bergen.
Eske sala ketsek, Ońtústik Qazaqstan oblysynda 840 mln teńgege áleýmettik mańyzdy azyq-túlik satyp alynǵan. Turaqty qordaǵy bul ónim bazardaǵy baǵa qymbattaı bastaǵanda satylady. Al áleýmettik-kásipkerlik qorynyń ókilderi qoımany taıaýda taǵy da toltyra bastaımyz dep otyr.
