OQO-nyń tótenshe jaǵdaılar departamenti tabysty qyzmet etip keledi
ShYMKENT. QazAqparat - Ońtústik Qazaqstan oblysy Tótenshe jaǵdaılar departamenti aımaqta tótenshe jaǵdaılardy boldyrmaý jáne olardyń aldyn alý máselesin tabysty sheship keledi.
Oblystaǵy tabıǵı baılyqtardy, halyqty, túrli nysandardy berik qorǵaýdy qamtamasyz etý úshin materıaldyq-tehnıkalyq bazany nyǵaıtýǵa, oblystaǵy órt sóndirý-qutqarý bólimshelerin ınnovatsııalyq tehnıkamen qaıta jaraqtandyrýǵa, jańa úlgidegi órt sóndirý depolarynyń qurylysyna jáne eń sońǵy úlgidegi arnaıy tehnıkalardy satyp alýǵa jyl saıyn respýblıkalyq bıýdjetten bólinetin qarjy kólemi ulǵaıýda. Sózimizdiń dáleli retinde 2015 jyly Shymkent qalasyndaǵy «Dostyq» jańa shaǵynaýdanyndaǵy shtattyq sany 126 adam qyzmet etetin órt sóndirý deposynyń ashylýyn, Kentaý qalasyndaǵy eski órt sóndirý bóliminiń kúrdeli jóndeýden ótkenin ataýǵa bolady. Jergilikti atqarýshy organdarmen tyǵyz yntymaqtastyq ornatý nátıjesinde TJD-niń qutqarý bólimsheleriniń materıaldyq-tehnıkalyq bazasy nyǵaıtyldy. Sońǵy jyldary olardy jabdyqtandyrýǵa 177 110 mln. teńge bólinip, avtomobıl jáne arnaıy tehnıka parki 50%-ǵa jańartyldy. Jaýyngerlik jáne shuǵyl daıyndyqty kóterý úshin TJD-da zamanaýı órt sóndirý jáne júrip ótý múmkindigi joǵary «Marsh-Bronto» tehnıkasy, apattyq-qutqarý avtokólikteri, órtti zertteýge múmkindik beretin jáne órttiń shyǵý sebepteri men kózderin anyqtaıtyn órt sóndirý zerthanasy bar. Kez kelgen jolda júre beretin «Trekol» avtomashınasy jol jabylǵan kezde jáne qar basyp qalǵan jaǵdaıda qutqarý jumysyn júrgizýge múmkindik beredi.
