OQO-nyń Tóle bı aýdanynda qus fermasynyń qurylysy bastaldy

ASTANA. QazAqparat - Ońtústik Qazaqstan oblysynyń ákimi Janseıit Túımebaevtyń qatysýymen Tóle bı aýdanynda «Kooperatsııa - agroónerkásip keshenin damytýdyń negizi» atty taqyrypta qus sharýashylyǵyn damytýǵa arnalǵan mamandandyrylǵan kóshpeli semınar ótti, dep habarlaıdy oblys ákiminiń baspasóz qyzmeti.

Sharaǵa aýyl sharýashylyǵy basqarmasynyń mamandary, aýdan ákimderiniń orynbasarlary, sharýalar men qarjy uıymdarynyń ókilderi qatysty.

Aımaq basshysy aldymen Kıeli tas aýylynda «Leńgir qus» fermasynyń irgetasyna kapsýla salyp, qus sharýashylyǵynyń damýyna sáttilik tiledi.

«Elbasynyń aýylsharýashylyǵy kooperatsııasyn damytý jónindegi tapsyrmasyna oraı biz oblystyń barlyq aýdandarynda aýyl sharýashylyǵyn damytý maqsatynda mamandandyrylǵan semınarlar ótkizýdemiz. Búgin ózderińiz kýá bolyp otyrǵan Tóle bı aýdanynda taýyq sharýashylyǵymen aınalysýǵa bel býǵan 24 kásipker «Leńgir qus» aýylsharýashylyq kooperatıvin quryp, memleketten jeńildetilgen nesıege qol jetkizip jumysyn bastaǵaly otyr. Bul ózgelerge ónege bolýy tıis», - dedi Janseıit Qanseıituly.

Aıta keteıik, shaǵyn qus fermalarynyń qural-jabdyqtaryn satyp alýǵa ketken shyǵynnyń 50 paıyzy memleket tarapynan sýbsıdııalanady. Sondaı-aq satyp alynǵan asyl tuqymdy etti shójelerdiń ár basyna 400 teńgeden demeý qarjy qarastyrylǵan. Budan bólek, sharýalar óndirilgen qus etiniń ár kelisine 40 teńgeden kómek qarjy alatyn bolady. 

Atalǵan qus fermasy  jarty ǵasyrlyq tarıhy bar  «Shymkent qus» JShS-nyń birlesken kásiporyny. Búginde atalǵan qus fermasynda 600 myńnan astam qus ósiriledi. Taýyq fermasy jylyna  14 mln dana jumyrtqa óndiredi. Ónimder ońtústik óńiri men qatar kórshiles oblystarǵa da jóneltiledi.  

Semınar barysynda qus sharýashylyǵyn damytý jaıy keńinen talqylanyp, qatysýshylarǵa memleket tarapynan beriletin jeńildikter jaıynda paıdaly maǵlumattar berildi. Sharanyń maqsaty - qus sharýashylyǵynda koopertıvter qurý arqyly ónimniń kólemin ulǵaıtý.

Búginde oblysymyzda 2 mln.  401 myń bas qus ósiriledi.  Onyń  50 paıyzy jeke jáne qosalqy sharýashylyqtardyń enshisinde. Ońtústik  óńiri óz-ózin qus etimen  74,3 paıyz, al  jumyrtqamen 75 paıyz  qamtýǵa qaýqarly. Sondyqtan birikken kásiporyndar aldynda qus  sharýashylyǵynda damytyp, ónim kólemin  arttyrý  maqsaty tur.

Munan soń óńir basshysy Kóksáıek aýylyndaǵy «ADS Agro» JShS jumysymen tanysty. Aýmaǵy 19 gektardy quraıtyn seriktestik asyl tuqymdy jylqy jáne iri qara  ósirýmen aınalysady. Qojalyqtaǵy  2012 jyly ashylǵan mal bordaqylaý alańy 1 560 basqa eseptelgen. Búgingi kúnge  munda 600 bas  iri qara mal bordaqylanyp jatyr. Sonymen birge, munda mal soıý beketi jumys istep tur. Qojalyqqa  «KazAgroQarjy» AQ 214 mln. teńge kóleminde nesıe bergen.  Bul qarjy negizinen mal bordaqylaý alańynyń qurylysyna jumsalypty.

Qazirgi tańda júzge jýyq adamdy jumyspen qamtyp otyrǵan sharýashylyq byltyr óndirilgen ettiń ár kelisine 170-teńgeden jáne iri qara  mal  etine memleketten 75.4 mln. teńge sýbsıdııa alǵan.