OQO-nyń Tóle bı aýdanynda 10 shaǵyn sý elektr stantsııasy salynady
ASTANA. QazAqparat - Bul týraly Óńirlik kommýnıkatsııa qyzmetinde ótken brıfıngte Tóle bı aýdanynyń ákimi Buharbaı Parmanov málim etti. Tóle bıde atqarylǵan jumystar men aldaǵy josparlaryna toqtalǵan aýdan basshysy aldaǵy ýaqytta balamaly energııa kózderin damytý boıynsha aýdanda 20 MVt elekt energııasyn óndiretin irili-usaqty 10 sý elektr stantsııasy salynatynyn aıtty, dep habarlaıdy Ońtústik Qazaqstan oblysy ákimdiginiń baspasóz qyzmeti.
Al bıylǵy jyly joǵarǵy Aqsý men Saıram ózenderi boıynan ınvestıtsııa kólemi 1,5 mlrd. teńge bolatyn 5 MVt elektr qýatyn óndiretin GES paıdalanýǵa beriledi. Sonymen qatar, ol memlekettik baǵdarlamalardyń aýdanda tabysty júzege asyrylýynyń nátıjesinde aýdan ekonomıkasy edáýir artyp, halyqtyń turmys-tirshiligi aıtarlyqtaı jaqsara túskenin aıtty.
«Bıyl aýdan bıýdjetiniń kólemi 17 mlrd. teńgeni qurady. Al jalpy óńirlik ónim osy jyldyń tórt aıynda 20 mlrd. teńgege jetti. Negizgi kapıtalǵa baǵyttalǵan ınvestıtsııalar kólemi 1808,9 mln. teńge bolyp, byltyrǵy jyldyń tıisti kezeńimen salastyrǵanda 104,3 paıyzdy qurady. Ónerkásip salasynda osy jyldyń 4 aıynda 7 mln. 456 myń teńgeniń ónimi óndirildi. Onyń ishinde qaıta óńdeý salasynda 6 mlrd. teńgeden astam ónim óndirilse, onyń ónerkásiptegi úlesi 87,9 paıyzdy quraıdy»,-dedi aýdan ákimi.
Sonymen qatar, brıfıng barysynda aýdan ákimi B.Parmanov ındýstrııaldy aımaqta 40 gektar jerge «Nurly shapaǵat» JShS-gi qurylys materıaldyn shyǵaratyn 6 zaýyttyń qurylysyn salýdy josparlap otyrǵanyn jetkizdi.
