OQO-nyń syrtqy taýar aınalymy 928 mln AQSh dollaryn qurady
ASTANA. QazAqparat - Ońtústik Qazaqstan oblysynyń syrtqy taýar aınalymy osy jyldyń jarty jylynda 928 mln AQSh dollaryn qurady. Bul ótken jyldyń 6 aıymen salystyrǵanda 169 mln AQSh dollaryna ósip otyr. Búgin bul týraly Óńirlik kommýnıkatsııalar qyzmeti ortalyǵynda ótken baspasóz máslıhatynda Ońtústik Qazaqstan oblysy boıynsha Memlekettik kirister departamentiniń basshysy Altynsary Úmbetálıev málim etti. Bul týraly ákimniń baspasóz qyzmeti habarlaıdy.
Sondaı-aq, taýarlardyń eksporty 37 mln AQSh dollaryna kóbeıgen. Eksport boıynsha oblysymyzdyń jalpy eksportynyń negizgi seriktesteri retinde Nıderlandy (39%) men Ózbekstan (32%) memleketteri qurap otyr.
Departament basshysynyń aıtýynsha, óńirdegi taýarlar ımporty 140 mln AQSh dollaryna nemese 34 paıyzǵa kóbeıgen. Import boıynsha oblystyń negizgi seriktesi Qytaı men Ózbekstan memleketteri bolyp otyr.
«Atap ótetin jaǵdaı, Qazaqstan Respýblıkasynyń Prezıdenti Nursultan Nazarbaev pen Ózbekstan prezıdenti Shafkat Mırzıeevtiń bastamalary jańa serpilis ákelip, nátıjesinde jyl basynan beri eki el arasyndaǵy ekonomıkalyq ahýal jandana tústi. Ózderińiz kýá bolǵandaı, aǵymdaǵy jyldyń 13 shildesinde «Atameken» keden beketiniń «Syrdarııa» jáne «Tselınnyı» ótkizý beketteri ashylǵany, eki eldiń yntymaqtastyǵy men birligin arttyryp qana qoımaı, taýar aınalymynyń ósýine, saýdanyń damýyna da oń áserin tıgizetini sózsiz», - dedi Altynsary Úmbetálıev.
Sondaı-aq, departament basshysy 2017 jyldyń 1 jartyjyldyq jumys qorytyndysymen kedendik tólemder men salyqtar ótken jylmen salystyrǵanda 3,1 mlrd. teńgege artyp, 113 paıyzǵa óskenin jetkizdi.
Sonymen qatar, brıfıngte departament basshysy sońǵy kezde jeke ınvestıtsııalar naryǵynda elimizde qarjy pıramıdalary jandana bastaǵanyna baılanysty halyqtyń aldaýǵa túspeýine keńes berip, túsindirý jumystaryn júrgizý úshin buqaralyq-aqparat quraldaryn birlese jumys atqarýǵa shaqyrdy.
