OQO-nyń ozat oqýshylary tarıhı-tanymdyq saparǵa shyqty

ShYMKENT. QazAqparat - Ońtústik Qazaqstan oblysynda  mekteptiń ozat oqýshylary búgin tarıhı-tanymdyq saparǵa shyqty. Kerýen kósh Elbasynyń «Bolashaqqa baǵdar: rýhanı jańǵyrý» maqalasyn qoldaý maqsatynda uıymdastyryldy, dep habarlaıdy QazAqparat tilshisi.

Baǵdarlama boıynsha ozat degen 150 oqýshy 5 kún boıy óńirimizdegi tarıhı murajaılarmen tanysady. Bul toqsanaralyq demalysta bala janyn rýhanı sergitýge arnalǵan taǵylymdy shara bolyp otyr. Jasóspirimderdiń  «Oblys tarıhy» atty kerýen -sherýiniń alǵashqy kúni Saıram aýdanynda ótedi. Ibrahım ata, Qarashash ana kesenelerinen bastap, áýlıeli-ámbıeli aımaqtyń tarıhı mekenderin aralaıdy. Kelesi kúnderi Otyrar, Báıdibek aýdandarynda is-shara jalǵasatyn bolady. Bul rette sala mamandary sapardyń mańyzyn balalarǵa «ótkenińdi tanyp, tarıhyńdy uǵyný - rýhanı jańǵyrýdyń alǵashqy baspaldaǵy» dep túsindirdi.  Bul sherýdiń óskeleń urpaqqa bereri mol, -deıdi jetekshiler.

Sapar barysynda balalar tarıhı mańyzy bar oryndardy aralap qana qoımaıdy. Kórgen-bilgenin sýretke túsirip, sol jaıynda shyǵarma jazady. Bes kúnniń qorytyndysy boıynsha eń úzdik eńbekter saraptalyp, júldeli baǵa beriledi.  Osylaısha, ozat oqýshylar demalys kúnderin tıimdi ótkizip, eltaný máselesinde júıriktikterin pash etpek.