OQO-nyń Otyrar aýdanynda Táýelsizdik kúnine oraı 20 jańa nysan ashyldy
ASTANA. QazAqparat - Ońtústik Qazaqstan oblysynyń Otyrar aýdanynda Táýelsiz elimizdiń mereıli merekesine oraı 20 nysan el ıgiligine berildi, dep habarlaıdy Ońtústik Qazaqstan oblysynyń ákimdigi.
Nysandardyń saltanatty ashylý rásimine aýdan ákimi Erlan Aıtahanov arnaıy qatysyp, aýyl turǵyndaryn qýanyshtarymen quttyqtady.
Mereke qarsańynda Baltakól aýyldyq okrýginde jańadan 4 nysan ashyldy. Eldi mekenniń kireberisinde salynǵan bas qaqpa aýyldaǵy aǵaıynnyń alǵashqy qýanyshyna aınaldy. Mereke qarsańynda kásipkerler alystan kórinetin nysandy týǵan jerge tartý etken. Qurylys jumystaryna 600 myń teńge qarjy jumsalǵan.
Sondaı-aq, atalǵan aýylda tary-talqan óńdeıtin 2 tseh jumysyn bastady. Aýyl azamaty, kásipker Serǵazy Batyrbekov halyq suranysyna ıe tsehty ashý burynnan oıda júrgenin aıtady. Kásipkerlik nysan qazirdiń ózinde 10 azamatty turaqty jumyspen qamtyp otyr.
Otyrar aýdanynda jańadan ashylǵan 9 birdeı veterınarlyq pýnkttiń bireýi osy Baltakól aýylyna tıesili. Qalǵan mal dárigerlik beketteri Otyrar, Shilik, Talapty, Aqqum, Qoǵam, Qarǵaly, Maıaqum aýyldyq okrýgterinde ornalasqan. Veterınarlyq klınıka múıizdi iri qaralardy qoldan uryqtandyrý, mal basyn asyldandyrý, dıagnostıkalaý jáne úı janýarlarynyń asa juqpaly aýrýlarynyń aldyn-alý baǵytyndaǵy profılaktıkalyq jumystarymen aınalysady. Ár jobanyń quny 8 mln. teńge.
Sonymen qatar aýdanda 3 feldsherlik-akýsherlik tirek ashyldy. Medıtsınalyq mekemeniń árqaısysyna memlekettik bıýdjetten 65 mln 556 myń teńge qarjy qaralǵan. Odan bólek birqatar saýda ortalyqtary men 1 kópir el ıgiligine berildi.
