OQO-nyń ónerpazdary Eýropa men Azııanyń 9 memleketinde óner kórsetti
ShYMKENT. QazAqparat - Ońtústik Qazaqstan oblysynyń ónerpazdary osy jyldyń sáýir men naýryz aılarynda Eýropa men Azııanyń 9 memleketinde 22 kontsert qoıdy. Bul týraly óńirlik kommýnıkatsııalar qyzmetinde ótken baspasóz konferentsııasynda oblystyq mádenıet jáne tilderdi damytý basqarmasynyń mádenıet jáne óner bóliminiń basshysy Ǵalııa Sharafıeva málim etti, dep habarlaıdy QazAqparat tilshisi.
«Elbasynyń «Bolashaqqa baǵdar: rýhanı jańǵyrý» maqalasy aıasynda TÚRІKSOI uıymynyń uıymdastyrýymen Naýryz merekesine arnalǵan kontserttik baǵdarlamamen shetelde óńirdegi Shámshi Qaldaıaqov atyndaǵy oblystyq fılarmonııanyń ártisteri men halyqaralyq bı baıqaýlarynda júldeli oryndarǵa ıe bolyp júrgen «Qazyna» bı ansambli jáne túrkistandyq «Semser» toby óner kórsetti.
Olar Eýropanyń Bosnııa jáne Gertsegovına sııaqty memleketterindegi Zenıtsa, Saraevo, Mostar qalalarynda, Chernogorııanyń Tsetıne, Albanııanyń Tırana, Makedonııanyń Gostıvar, Bolgarııanyń Plovdıv jáne Sofııa qalalarynda boldy. Al oblystyq opera jáne balet teatrynyń solısteri men mádenıet jáne halyq shyǵarmashylyǵynyń ártisteri Fınlıandııa, Shvetsııa, Estonııa elderinde óner kórsetti»,-dedi Ǵalııa Sharafıeva.
Halyqaralyq TÚRІKSOI uıymynyń rejısseri Arman Nurmahamatulynyń sózinshe, ońtústiktiń ónerpazdary Túrkııa elinde naýryz aıynda ótken «Kastamoný - Túrki áleminiń mádenı astanasy» jylynyń ashylý saltanatyna oblys ákiminiń qoldaýymen baryp qaıtqan.
«Ár elden kelgen ónerpazdar óz dástúrin, tili men dilin óner arqyly nasıhattap, týystyǵy berik Túrki eline shýaǵyn shashty. Onda Ońtústik ónerpazdary «Saryarqa» ánimen Kastamoný kógin ánmen terbetip, «Babalar rýhy» ánin oryndaǵan «Semser» tobynyń jigitteri el yqylasyna bólendi. Órnekti bıimen halyqaralyq júldelerdi qanjyǵasyna baılap júrgen «Qazyna» bı ansambliniń árbir qımyly patrıottyq rýhpen úndesip, tatýlyq pen bereke-birlikti pash etti. Budan bólek, atalǵan óner maıtalmandary Túrkııanyń Kastamoný, Ankara, Ystanbul qalalarynyń turǵyndaryna kontserttik baǵdarlama usyndy»,-dedi Arman Nurmahamatuly.
Budan bólek, spıkerler Elbasynyń «Bolashaqqa baǵdar: rýhanı jańǵyrý» maqalasy men Astananyń 20 jyldyǵyna oraı óńirde oblystyq «Burań bel» bı festıvali jáne «Qazyna» bı ansambliniń 30 jyldyǵyna arnalǵan «Dala rýhy» mereıtoılyq kontserti ótetinin atap ótti.
