OQO-nyń Memlekettik kirister departamenti 764 qylmystyq is qozǵady
Bul týraly búgin Óńirlik kommýnıkatsııalar qyzmetinde ótken brıfıng barysynda Departament basshysynyń orynbasary Saıat Saýqombekov málimdedi, dep habarlaıdy QazAqparat HAA tilshisi.
Onyń aıtýynsha, óndiriste bolǵan qylmystyq isterdiń 476-sy tergeýmen aıaqtalyp, 336 is sotqa joldanǵan. Aıaqtalǵan qylmystyq isterdiń memleketke keltirgen zalal somasy 22,8 mlrd. teńgeni qurady, quny 1 mlrd. teńgeniń múlkine tyıym salyndy. Qylmystyq isterdiń basym kópshiligi jalǵan kásipkerlik, salyq tólemeý, ekonomıkalyq kontrabanda jáne kedendik tólemderdi tóleýden jaltarý derekteri boıynsha tirkelgen. Sondaı-aq esirtkiniń zańsyz aınalymy boıynsha - 29, zańsyz oıyn bıznesi boıynsha - 66, alkogol óniminiń aınalymy boıynsha - 11 jáne jalǵan aqsha jasaý boıynsha 12 qylmystyq is tergeýmen aıaqtalǵan.
Oıyn bıznesin uıymdastyrý salasynda zańsyz jumys jasap kelgen 64 oıynhananyń joldary kesilip, 5 mln. teńgeden astam qarajat tárkilendi.
Qazaqstan aýmaǵyndaǵy ınternet-resýrstarǵa monıtorıng jasaý nátıjesinde, onlaın-kazınolar qyzmetin kórsetetin saıttar anyqtalǵan.
Atalǵan zańsyz áreketteri úshin barlyǵy 29 tulǵa ustalǵan, olardyń 22-si - Ózbekstan Respýblıkasynyń, 7-si Qazaqstan azamattary.
"Bizdiń oblysqa kontrabandalyq jolmen ákelingen 50 keli altyn jáne kúmis zergerlik buıymdar tárkilendi. Osy qylmysqa qatysy bar tulǵa sot úkimimen tıisti jazasyn aldy. Tárkilengen taýardyń quny 1,5 mlrd. teńgeni qurady. Sot sheshimimen barlyq múlik memleket paıdasyna tárkilendi", - dedi Saıat Saýqombekov.
