OQO-nyń Maqtaral aýdanynda jyl basynan 134 joba iske asty
ASTANA. QazAqparat - Ońtústik Qazaqstan oblysynyń Maqtaral aýdanynda 2017 jyldyń basynan beri 316,3 mıllıon teńgeni quraıtyn 134 joba qarjylandyryldy, dep habarlaıdy QazAqparat.
OQO ákimdiginiń baspasóz qyzmetinen málim etkendeı, Maqtaral aýdanynda jyl bastalǵaly 316,3 mıllıon teńgeniń 134 jobasy qarjylandyryldy. Onyń ishinde «Ońtústik» AIO arqyly 6,5 mıllıon teńgelik - 1 joba, «Yrys» MKU arqyly 309,8 mıllıon teńgelik 133 joba iske asty.
Maqtaral aýdanynda «K.Bahytjan» kooperatıvi «Ońtústik» AIO arqyly 26 mıllıon teńge nesıe alyp 5 dana «Belarýs» markaly traktor satyp alǵan. Jańa tehnıkalardyń arqasynda kooperatıv aýyl sharýashylyǵy ónimderin eselep arttyrǵan.
Búginde kooperatıvtiń 460 gektar jeri bar. Kooperatıvtiń is júrgizýshisi Súleımen Qaraevtyń aıtýynsha, onda maqta, qaýyn-qarbyz daqyldary ósiriledi.
«Belarýs» traktorynan bólek eski 10 traktor, 5 kombaın, 15 telejka, 5 dári shashatyn OBQ taǵy basqa tehnıkalarymyz bar. Degenmen, jańa tehnıkalardyń arqasynda ónimimizdi eselep arttyryp otyrmyz. Kooperatıv 50 adamdy jumyspen qamtyp otyr», - deıdi S.Qaraev.
«2009-2017 jyldar aralyǵynda «Ońtústik» AIO jáne «Yrys» mıkro kredıttik uıymy arqyly Ońtústik Qazaqstan oblysynda 46,8 mıllıard teńgeni quraıtyn 15 336 joba qarjylandyrylǵan. Osynyń arqasynda 37 909 jańa jumys oryndary ashylǵan. Onyń ishinde 2017 jyldyń 4 aıynda 2,8 mıllıard teńgege 999 joba iske asqan» - deıdi «Ońtústik» AIO-nyń baspasóz hatshysy Mýattar Azadova.
Aıta keteıik, Ońtústik Qazaqstan oblysynda «Ońtústik» AIO jáne «Yrys» MKU arqyly eń kóp qarjylandyrylǵan Shymkent qalasy bolsa, ekinshi orynda Saıram aýdany tur. 4,9 mıllıard teńgemen Maqtaral aýdany úshinshi orynǵa jaıǵasqan. Jalpy, 8 jyl ishinde Maqtaral aýdanynda «Ońtústik» AIO jáne «Yrys» MKU arqyly 3 213 joba iske asqan.
