OQO-nyń qutqarýshylary Shyǵys Qazaqstanda sý bógetterin nyǵaıtyp jatyr
ShYMKENT. QazAqparat - Ońtústik Qazaqstan oblysyna qarasty Tótenshe jaǵdaılar departamentiniń toptastyrylǵan kúsh-quraldary Shyǵys Qazaqstan oblysyndaǵy sý basqan Glýbokoe jáne Shemonaıha aýdandarynda qutqarý sharalaryn jalǵastyrýda. Olar turǵyn úılerden, jer tólelerinen, úılerdiń aýlasynan erindi jańbyr sýlaryn sorǵytý jumystaryn júrgizýde, dep habarlaıdy QazAqparat tilshisi.
OQO Tótenshe jaǵdaılar departamentiniń málimetinshe, óńirdiń qutqarýshylary 5 kún ishinde 10 kóshede ornalasqan 45 úıden sý sorǵytý sharalaryn júrgizgen. Baspanalardan tartylǵan sýdyń jalpy kólemi 21 myń tekshe metrden asqan. 26-shy naýryzdan beri departamenttiń ekinshi toptastyrylǵan kúshteri Glýbokoe aýdanynda jumys atqaryp, ol jerde sýdy tartyp alý jumystarymen qatar sý bógetin nyǵaıtýǵa atsalysqan. Ondaǵy úıindilerdi kóterý úshin qum toltyrylǵan qapshyqtardy qoıý jumystaryn júrgizgen. Bul jumystar aýdannyń Glýbokoe, Progress, Predgornyı, Beloýsovka, Zarechnoe bes aýylynda atqarylypty.
Órt sóndirý qyzmetiniń ókilderi podpolkovnık N.Taýkeevtiń basshylyǵymen jalpy kólemi 28 myń tekshe metrden asatyn sýdy shyǵarǵan. Sonymen qatar órt sóndirýshiler alty aýyz sý qudyqty tazartýǵa kómekteskenin aıtady.
Avarııalyq-qutqarý jumystary Shyǵys Qazaqstannyń órt sóndirý bólimderimen birlesip júzege asyrylǵan. Túngi ýaqytta qutqarýshylar jeke turǵyn úılerdiń aýmaqtaryn aralap, kezekshilikti uıymdastyrýda. Sý basý saldaryn joıý jumystary táúlik boıy júrgizilýde eken.
