OQO-nyń Qazyǵurt ındýstrıaldy aımaǵynda 5 joba iske asyryldy
ShYMKENT. QazAqparat - Ońtústik Qazaqstan oblysy Qazyǵurt aýdanynda jyl basynan bergi alty aıta 33,2 mlrd teńgeniń ónimi óndirilip, ósim 28,5 paıyzdy kórsetti. Bul týraly búgin óńirlik kommýnıkatsııalar qyzmetinde ótken baspasóz máslıhatynda Qazyǵurt aýdanynyń ákimi Tólegen Telǵaraev málim etti, dep habarlaıdy QazAqparat HAA tilshisi.
Aýdannyń áleýmettik-ekonomıkalyq damý qorytyndysyn baıandaǵan ákim, ótken jyly «Óńirler kásipkerligin qoldaý kartasy» baǵdarlamasyna engen jalpy quny 2,6 mlrd. teńge bolatyn 7 jobanyń búginde beseýi iske qosylǵanyn aıtty. Osynyń nátıjesinde 162 adam turaqty jumyspen qamtylǵan. Al 2017 jyldyń sońyna deıin qosymsha eki jańa joba iske asyrylyp, 32 adam turaqty jumyspen qamtylatyn bolady. Bul kásiporyndardyń jalpy quny - 722,7 mln. teńge.
«2017 jyldyń alty aıynda óndirilgen ónim kólemi 2964,2 mln. teńgeni qurap, naqty kólem ındeksi 105 paıyzdy qurady. Ótken jyldyń tıisti kezeńimen salystyrǵanda 441 mln. teńgege artyq ónim óndirildi. Olardyń ishinde ken óndirý ónerkásibiniń basqa salalary boıynsha 40,7 mln. teńge, óńdeý ónerkásibi boıynsha 2363,6 mln. teńge, elektrmen jabdyqtaý, gaz berý boıynsha 527,8 mln teńge, sýmen jabdyqtaý boıynsha 32,1 mln. teńgege óndirildi»,- dedi Tólegen Telǵaraev.
Sondaı-aq aýdan ákimi jyl sońyna deıin ónerkásip óniminiń kólemin 6,1 mlrd. teńgege ıaǵnı, naqty kólem ındeksin 103,5 paıyzǵa jetkizý kózdelýde ekenin jetkizdi.
