OQO-nyń Qajymuqan stadıonynyń jaryq berý júıesi jańǵyrtyldy
ShYMKENT. QazAqparat - Ońtústik Qazaqstan oblysynyń ortalyq Qajymuqan atyndaǵy stadıonnyń shamdary iske qosylyp, projektorlary jańartyldy. Endi óńirdiń «Ordabasy» fýtbol komandasy óz alańyndaǵy oıyndaryn atalǵan stadıonda keshki ýaqytta da ótkize alady, dep habarlaıdy QazAqparat HAA tilshisi.
Buǵan deıin sheshimin tappaı kele jatqan jaryq máselesi jergilikti komandalardyń óz alańyndaǵy oıyndaryn ótkizýge kóp kedergi jasaǵany belgili. Qazaqstannyń fýtbol lıgasy ortalyq stadıonda oıyndar ótkizýge tıym salǵan soń, «Ordabasy» óz kezdesýlerin «BIІK» alańqaıynda ótkizgen bolatyn. Sondaı-aq EÝRO lıga aıasyndaǵy kezdesýlerin Almatynyń Ortalyq stadıonynda oınady. Endi memlekettik bıýdjetten bólingen 204 mln teńge qarjyǵa sapaly jaryqshamdar ornatyldy.
Mamandardyń aıtýynsha, elimizdegi úshinshi iri stadıon sanalatyn alańda jaryq qondyrǵylary sońǵy 50 jyldan beri almastyrylmaǵan. Sport nysany EÝRO talaptaryna saı, ıaǵnı ıtalııalyq zamanaýı elektr qondyrǵylarymen jabdyqtaldy.
Jaryqshamdardyń jaryq berý qabileti birneshe fýnktsııaly. Atap aıtqanda, jattyǵý jumystaryna, resmı oıyndarǵa jáne teletrnaslıatsııaly oıyndarǵa arnalǵan. Atalǵan alańda «Ordabasylyqtar» alǵashqy kezdesýin ótkizip, jeńiske jetti.
