OQO-nyń Qazaqstan halqy Assambleıasynyń músheleri Saıram aýdanynda jıyn ótkizdi

ShYMKENT. QazAqparat   - Ońtústik Qazaqstan oblystyq Qazaqstan halqy Assambleıasynyń uıymdastyrýymen Saıram aýdany Mankent aýylynda  túrli sala mamandary men jastardyń kezdesýi ótti. Basqosýda Memleket basshysynyń «Bolashaqqa baǵdar: rýhanı jańǵyrý» maqalasynda aıtylǵan mindetterdiń máni, eldiń birligi men tatýlyǵyn  saqtaý jáne nyǵaıtý jaıy sóz boldy, dep habarlaıdy QazAqparat tilshisi.

Alqaly jıynǵa oblystyq assambleıa hatshylyǵy men din máselelerin zertteý ortalyǵynyń qyzmetkerleri, etnomádenı birlestikterdiń tóraǵalary men aýdandyq jumyspen qamtý jáne áleýmettik baǵdarlamalar, ishki saıasat, ishki ister bólimderiniń mamandary qatysty. Keleli keńeste sóz alǵan  aýdan ákimi  Baqtııar Mamaev Elbasynyń baǵdarlamalyq maqalasynda  aıtylǵan qoǵamdyq sana, básekege qabilettilik, ulttyq kod, pragmatızmniń mán-mańyzyna keńinen toqtaldy. Al, jıynda sóz alǵan oblystyq Qazaqstan halqy Assambleıasy tóraǵasynyń orynbasary Muratáli Qalmuratov eldegi turaqtylyq pen kelisimdi saqtaýdyń mańyzyn sóz etti.
 

«Kez kelgen qoǵamda birlik pen yntymaq basty orynda turady. Yntymaǵy jarasqan eldiń bolashaǵy jarqyn. Muny memleketimizdiń bolashaq taǵdyryna jaýapty sanalatyn jastar jaqsy túsinýi tıis.  Sondyqtan, túrli etnos jastary arasynda dostyqty nyǵaıtý, olardyń boıynda eljandylyq qasıetti qalyptastyrý  assambleıa jumysynyń basty baǵytyna aınalyp otyr.  Qazaqstan - etnosaralyq kelisim salasynda óz tájirıbesin, biregeılik pen birtektiliktiń qaıtalanbas modelin qalyptastyrdy. Ony saqtap,  qoǵamdy damytýda jastarǵa artylar jaýapkershilik júgi aýyr»,- dedi Muratáli Orazalyuly.

Erkin formatta ótkizilgen jıynda aýyl jastary  usynys-pikirlerin ortaǵa salyp, ózderin  qyzyqtyrǵan túrli suraqtarǵa  sala mamandarynan tushymdy jaýap aldy.

Aınur Aqbaeva