OQO-nyń ındýstrııalyq aımaǵynda 19 mlrd teńgeniń jobalary iske asyrylady
ShYMKENT. QazAqparat - Ońtústik Qazaqstan oblysyndaǵy «Tassaı» ındýstrııalyq aımaǵynda jalpy quny 19 mlrd 684 mln teńgeni quraıtyn 7 joba iske asyrylatyn bolady. Nátıjesinde 720 jańa jumys orny ashylmaq. Bul týraly atalǵan óndiristik aımaqtyń jumysymen tanysqan oblys ákimi Janseıit Túımebaev málim etti, dep habarlaıdy QazAqparat tilshisi.
Óńir basshysy aldymen «Asia Trafo» JShS-de bolyp, 110-120 kVt bolatyn joǵary kerneýli transformator shyǵaratyn zaýytty aralap kórdi. 2016 jyldan bastap salyna bastaǵan nysandy iske qosý jumystary 2018 jyldyń ekinshi toqsanyna josparlanyp otyr.
«Zaýyt iske qosylýǵa ázirlik jumystaryn jandandyryp jatyr. Bul kásiporyn iske qosylǵan jaǵdaıda 400 adamdy jumyspen qamtýǵa múmkindik týady. Eń bastysy, qazirgi tańda kásiporynda atqarylyp jatqan jumystarǵa oń baǵa berýge bolady. Sondyqtan jumysty josparly túrde júrgizip, zaýytty erterek iske qosýǵa mán bergen jón», - dedi Janseıit Qanseıituly.
Aıta keteıik, kásiporyn kásipkerlikti qoldaý kartasynyń aıasynda júzege asyrylýda. Mundaǵy joba quny 17,5 mlrd teńgeni quraıdy. Zaýyt jylyna 120 transformator shyǵarýdy josparlap otyr. Al ónimderi Qazaqstan men TMD elderiniń suranysyn qanaǵattandyratyn bolady.
Jalpy, «Tassaı» ındýstrııalyq aımaǵynyń jalpy aýmaǵy 89 gektardy quraıdy. Munda búginde jalpy quny 37 mlrd 948 mln teńgeni quraıtyn 25 ınvestıtsııalyq joba júzege asyrylýda. Jobalar tolyq iske assa, 1631 jumys orny ashylmaq.
Indýstrıaldy aımaqty aralap kórgen óńir basshysy kógaldandyrý jáne abattandyrý jumystarynyń da barysymen tanysty. Qazirgi tańda aımaqta 2500 dekoratıvti tal-daraq otyrǵyzylǵan. Olardyń arasynda qaıyń, qyrymdyq qaraǵaı, qaraǵash syndy túrleri de bar.
