OQO-nyń aýyl mektepterine 500-den asa kitap syıǵa tartyldy

ShYMKENT. QazAqparat - Ońtústik Qazaqstan oblysy Otyrar aýdanynyń mektepteri men kitaphanalaryna 500-den asa ǵylymı-ádebı kitap syıǵa tartyldy, dep habarlaıdy QazAqparat HAA tilshisi.  

Mundaı tartýdy Otyrar aýdanynyń orta bilim ordasyn 30 jyl buryn aıaqtaǵan túlekter jasady. Elbasynyń «Bolashaqqa baǵdar: rýhanı jańǵyrý» maqalasyn qoldaýshylar, sonymen qatar ózderi oqyǵan mektepke zaman talabyna saı tehnıkalar tabystady. Aýyl meshitterine de dinı kitaptar men jýrnaldar tapsyryldy. Týǵan jerge kelip, bas qosqan túlekter shara barysynda kózden taıǵan ustazdary men qurbylarynyń rýhyna quran baǵyshtap, as berdi. Kópshilikti jınap, «Táýelsizdik -tiregim, máńgilik el - muratym» atty kontsert uıymdastyrdy.

Aıta keteıik, 1987 jyly Muhtar Áýezov mektebin 150 túlek bitirip shyqqan. Olar búginde  Qazaqstannyń ár túpkirinde eleýli qyzmetter atqaryp júr.  Al ulylar mekeninde ósip óngen býyndy jınap, týǵan jerge tý tigýge úndegen aýdan ákimi Erlan Aıtahanov boldy. Kezdesýge aýdan basshysy da qatysyp, eline qolǵabys etken azamattarǵa alǵysyn jetkizdi.

«Táýelsizdigimizdiń 25 jyly ishinde ósip-ónip, aıaqqa nyq turyp, mine, qazir túlep ushqan azamattar týǵan jerine taǵzym etip, qolǵabys etip otyr. Ustazdaryn umyt qaldyrmaı,  bar baqytyn elmen bóliskenderge aýyl alǵysy sheksiz.  Mektepke tartý etken syı-joralǵylar keleshek óskinniń laıyqty bilim alýyna,  oń baǵytta ósýine septigin tıgizedi dep senemiz»,- dedi ákim.

Óz kezeginde ál-Farabı atyndaǵy Qazaq ulttyq ýnıversıteti men Otyrar aýdany arasyndaǵy ózara áriptestikti nyǵaıtyp, jańǵyrtqany úshin Erlan Aıtahanovqa ýnıversıtettiń Ǵylymı keńesi arnaıy tósbelgi taqty.