OQO-nyń Astanada ótkizgen bıznes-forýmynda 6 memorandýmǵa qol qoıyldy
ShYMKENT. QazAqparat - Búgin Astana qalasynda Ońtústik Qazaqstan oblysynyń kúnderi aıasynda «Ontustik Business: Múmkindikter men áleýet» atty bıznes-forým bolyp ótti.
QR «Atameken» UKP basqarma tóraǵasynyń orynbasary Nurjan Áltaev pen «Qazaqstan Damý banki» AQ tóraǵasy Bolat Jámishev qatysqan forýmda damý ınstıtýttary men ekinshi deńgeıli bankter men kásipkerlerden quralǵan 150- ge jýyq adam boldy, dep habarlaıdy QazAqparat HAA tilshisi.
Bıznes-forým barysynda óńirdiń ınvestıtsııalyq jobalary, ınvestpreferentsııalar men týrıstik ónimderdiń tanystyrylymy ótti. Kezdesýdiń basty maqsaty - ońtústiktiń ınvestıtsııalyq múmkindikterin tanystyra otyryp, óńirge ınvestıtsııa tartý. Osy arqyly oblys ekonomıkasyn damytý jáne óńirge týrısterdi kóptep shaqyrý boldy.
Aıta keteıik, Ońtústik Qazaqstan oblysy ekonomıkalyq áleýeti zor, turaqty damyp kele jatqan óńir sanalady. Bul rette oblys ákimi Janseıit Túımebaev aımaq Orta Azııa, Taıaý Shyǵys pen Eýropa elderin baılanystyratyn joldardyń qıylysynda ornalasqanyn, sonyń nátıjesinde shekaralyq saýda-sattyq pen eksporttyq óndiris damyp keletinin jetkizdi.
«Ózderińizge belgili, álemde sapaly azyq-túlik ónimine degen suranys jyl saıyn artyp keledi. Tutynýshy sapa men qaýipsizdikti talap etedi. Bul turǵyda Qazaqstanǵa Reseı, Qytaı, Iran jáne basqa da elder sekildi jańa naryq ashylýda. Osy naryqty ıgerýde Ońtústik Qazaqstan oblysynyń áleýeti zor. Sebebi, tarıhı ólkeniń agrarly salasy jaqsy damyǵan. Sońǵy 3 jylda jınalǵan baqsha ónimderiniń kólemi 1 mıllıon tonnadan asyp túsedi. Qazaqstandaǵy jylyjaıdyń 90 paıyzy bizdiń óńirde ornalasqan. Maqta tolyǵymen, al júzim men baqsha ónimderiniń 70 paıyzy osy oblysta ósiriledi»,-dedi oblys ákimi J.Túımebaev.
Bıznes-forým aıasynda 6 memorandýmǵa qol qoıyldy. Solardyń alǵashqysy bolyp «Shymkent» «Áleýmettik-kásipkerlik korporatsııa» Ulttyq kompanııasy» AQ-y Qytaıdyń Anhoı provıntsııasy halyqaralyq saýda qatynasyn damytý komıtetimen ekijaqty túsinistik jóninde memorandým túzildi. Sondaı-aq dál osy kompanııa «NG-Energo» AAQ-men áriptestik arttyrý jóninde kelisimge keldi. Qos tarap aldaǵy ýaqytta ózara qarym- qatynasty damyta túsýge ýaǵdalasty.
Sonymen qatar, Ońtústik Qazaqstan oblystyq kásipkerlik, ındýstrııaldy -ınovatsııalyq damý jáne týrızm basqarmasy men «POWER LANDMARK HOLDINGS LTD» kompanııasy arasynda ózara kelisimge kelip, ınvestıtsııalyq jobalardy iske asyrý jóninde memorandýǵa qol qoıdy.
